މިސްކިތު ވަޒީފާގެ ކަންތަކުގައި ސިވިލްސާރވިސްގައި މައްސަލަޖައްސައިފި.
ޚަބަރު: އަޙްމަދު ދާއޫދު
ލަންދޫ މަސްޖިދުލް ބަރަކާތު ( އަތިރީމިސްކިތް ) ގެ މަސައްކަތު މީހެއްގެ ވަޒީފާ ވަކިފަރާތަކަށް ހަމަޖައްސަން ލަންދޫ އޮފީހުން ، ޤަވާއިދާއި ޚިލާފަށް މަސައްކަތް ކުރަމުން ދާކަމަށް ބުނެ ލަންދޫ ރައްޔިތަކު ސިވިލްސަރވިސް ކޮމިޝަނުގައި ޝަކުވާކޮށްފިއެވެ. މިމައްސަލަ ހިގަމުންދާގޮތް ވަރަށް ރަގަޅަށް ބައްލަވައިދެއްވުމަށް އެދި ސިވިލްސަރވިސް ކޮމިޝަނަށް ސިޓީ ފެކްސްކޮށްފައިވަނީ މިދިޔަ ހަފްތާގައި ކަމަށް މަޢުލޫމާތު ލިބިފައިވެއެވެ.
މިސްކިތު މަސައްކަތު މީހެއްގެ ވަޒީފާއަށް އިޢުލާން ކުރުމާއި ގުޅިގެން އެވަޒީފާއަށް އެދި ޖުމުލަ 11 ފަރާތަކުން ސިޓީލައިފާވާކަމަށް ލަންދޫ ކުޑަކަތީބު އަލްފާޟިލް ޢަބުދުއްނާޞިރު ޢަލީ ވިދާޅުވިއެވެ. އެބޭފުޅާ އިތުރަށް ވިދާޅުވިގޮތުގައި ސިޓީލީ އެންމެންނާވެސް ވާނީ އިންޓަވިޔު ކޮށް އެ އިންޓަވިޔުގެ ނަތީޖާއާއި އެހެނިހެން މަޢުލޫމާތުތައްވެސް އިސްލާމީ ކަންތައްތަކާބެހޭ މަތީމަޖިލީހަށް ފޮނުވާފައެވެ.
ވަކިބޭފުޅަކަށް މިވަޒީފާ ހަމަޖައްސަން ލަންދޫއޮފީހުން ޚާއްޞަކޮށް ކުޑަކަތީބު ޢަބުއްނާޞިރު މަސައްކަތް ކުރައްވާ ކަމަށް ތުހުމަތު ކޮށް މިވަޒީފާއަށް އެދިފައިވާ ބައެއްމީހުން ހިތްހަމަނުޖެހުން ފާޅުކުރަމުން ގެންދާތީ ، މިއީ ކިހިނެއްވެގެން ފެތުރިގެން އުޅޭ ވާހަކައެއްތޯ ދަންނަވާލުމުން ކުޑަކަތީބު އަބުދުއްނާޞިރު އެކަންދޮގުކުރައްވާ ވިދާޅުވީ އެއީ އެއްވެސް ޙަޤީޤަތެއް ނެތްވާހަކައެއް ކަމަށެވެ. ވަކި މީހަކަށް އެވަޒީފާ ހަމަޖައްސަން އޮފީހުން މަސައްކަތް ނުކުރާކަމުގައެވެ.
ވަޒީފާއަށް ކުރިމަތިލީފަރާތްތަކާއި އިންޓަވިޔު ކުރި ޓީމުގައިވެސް އަބުދުއްނާޞިރު ހިމެނިލައްވާތީ އިންޓަވިޔުގެ ކަންތައްތައް ދިޔައީ ކިހިނެތްތޯ ދަންވާލުމުން ވިދާޅުވީ މީގެ ތެރެއިން 9 ފަރާތަކާއި އިންޓަވިއު ކޮށްފައިވާނީ ސީދާ ރަށުއޮފީހުގައި ކަމުގައެވެ. އަދި އަނެއް ދެފަރާތް އެވަގުތު ރަށުގައި ނެތުމުން އިންޓަވިޔު ކުރީ ޓެލެފޯނުން ކަމުގައެވ.ެ
ލަންދޫ ކެތި އަލްފާޟިލް މުޙައްމަދު އިބްރާޙީމް ގެ ވޭތުވެދިޔަ 5 އަހަރުދުވަހުގެ ކުށުގެ ރެކޯޑް ސާފުކުރުމަށް ބޭނުންވާކަމަށް ބުނެ ލަންދޫކޯޓަށް އައި މެސެޖަކާއި ގުޅިގެން ފެންމަތިވެގެން މިއުޅޭ މައްސަލަ މިހާރުމިވަނީ ލަންދޫ ގެ އެންމެހޮޓް މަޢުލޫއަކަށް ވެފައެވެ. ގިނަމީހުން ޤަބޫލުކުރާގޮތުގައި ކުށުގެ ރެކޯޑުސާފުކުރާނީ ވަޒީފާ ދެއްވަން ވެގެންނެވެ. ނުވަތަ އެވަޒީފާ ހަމަޖެހޭނީ އެފަރާތަށް ކަމަށެވެ.
އަލްފާޟިލް މުޙައްމަދު އިބްރާހީމަކީ ފޯނުން އިންޓަވިޔު ކުރި 2 ބޭފުޅުން ކުރެއެއްބޭފުޅާ ކަމުގައި އެނގިފައިވެއެވެ. އަނެއް ބޭފުޅަކީ ލަންދޫ ފުރަވެރި އަލްފާޟިލް ޢަބުދުﷲ ޢުމަރެވެ. ސަރުކާރުގެ ބައެއް މުއައްސަސާ ތަކުގައި ފޯނުން އިންޓަވިޔު ކުރުމަކީ ރަގަޅުގޮތެއްނޫން ކަމުގައި ބައްލަވާ އިންޓަވިޔު އަށް ޙާޟިރު ނުވާ ފަރާތްތަކެއް ޑިސްކޮލިފައި ކޮށް ހަދާފައިވަނިކޮށް މިވަޒީފާ އަށްފޯނުން އިންޓަވިޔުކުރުމުން ބަޔަކު ހިތްހަމަނުޖެހިގެން އުޅެނީ ކަމަށް ވަރަށް ގިނަފަރާތްތަކަކުން ބުނަމުން ގެންދެއެވެ. އަދި ފޯނުން އިންޓަވިޔު ކުރުން ސިވިލްސަރވިސް ކޮމިޝަން ހުއްދަނުކުރައްވާ ކަމަށްވެސް ސިވިލްސަރވިސް ކޮމިޝަނާ ޙަވާލާދީ އެފަދަފަރާތްތަކުން ބުނަމުން ގެންދެއެވެ.
ފޯނުން އިންޓަވިޔު ކުރެއްވީ ކޮންގޮތަކަށް ބައްލަވާފާތޯ ލަންދޫ ކުޑަކަތީބަށް ދަންވާލުމުން ވިދާޅުވީ އެކަން އެގޮތަށް ކުރެއްވީ ނ.އަތޮޅު އޮފީހުން ލަންދޫއޮފީހަށް އެގޮތަށް ލަފާދެއްވުމުން ކަމުގައެވެ. އަދި މިނޫނަސް ފޯނުން އިންޓަވިޔުތައް ކޮށްފާވާނެކަމަށް ވެސް އެބޭފުޅާ ވިދާޅުވިއެވެ.
ކޮންމެއަކަސް ލަންދޫގައި މީގެކުރިންވެސް ސަރުކާރުގެވަޒީފާތައް ހަމަޖެއްސުމުގައި އަމިއްލަ މަސްލަހަތު ކުރިއަށްނެރެ ބޭނުންހާ ބަޔަކަށް ވަޒީފާ ދެމުން އަންނަ ކަމަށް ތުހުމަތު ކޮށް މުއައްސަސާތަކުގެ ވެރިންނަށް ވަނީ ނުރުހުމުގެ އިނގިލި ވަރަށް ގިނަބަޔަކު ދިއްކޮށް އެފަރާތްތަކާމެދު ހިތްހަމަ ނުޖެހުން ފާޅުކޮށްފައެވެ.
މިފަހަރުގެ މިމައްސަލައިގައިވެސް އެންމެ އިސްކޮށް އުޅުއްވާ ލަންދޫ ޖައްވު އަލްފާޟިލް އިބްރާޙީމް ޒަކަރިއްޔާ މިމައްސަލައިގާ އޭނާ ތެދުވީ ވަރަށް ކެރިގެން ކަމަށާއި މިކަން ކޮންމެވެސް އެއްކޮޅެއްގައި ޖައްސާނެކަމަށްވެސް އޭނާ ދަނީ ހާމަކުރައްވަމުންނެވެ.
