ލަންދޫގެ ފުރަތަމަ ފަތުރުވެރި ދޯނި

Email: moosa.goma@yahoo.com

ލިޔުނީ : މޫސާ ހުސެއިން ( މިހާސް ) ސ

ލަންދޫގެ ތާރީޙްގައި ފުރަތަމަ ފަހަރަށް ފަތުރުވެރިންނަށް ޚާއްޞަ ކުރެވިގެން ބަދެވުނު ދޯނި
މިއަދުގެ 2:30 ވަނީ މޫދަށް ބާލާފައެވެ.
ލަންދޫގެ މަޝްހޫރު ވިޔަފާރިވެރިޔާ ނ.ލަންދޫ މުރިނގު އަލްފާޟިލް ޚާލިދު އަބޫބަކުރު
ގާތްގަޑަކަށް ހަލައްކަ ރުފިޔާ ޚަރަދު ކުރައްވައިގެން ބަދެ ނިންމާފައިވާ މިދޯނި ބޭލުމުގައި ރަށުގެ އެންމެހައި ރައްޔިތުންގެ ފުރިހަމަ އެއްބާރުލުން ލިބިފައިވާ ކަމުގައި މިދޯނި ބޭލުމުގައި އިސްކޮށް ހަރަކާތްތެރިވެލެއްވި މުޙައްމަދު އަޙްމަދު ލަންދޫ އިންފޯއަށް މަޢުލޫމާތު ދެއްވިއެވެ.
މުޅިން އާ އިންޖީނެއް އެޅި، އެންމެ ޒަމާނީ ފެންވަރަށް ތައްޔާރު ކުރެވިފައިވާ މި ދޯނީގެ
ވަޑާމުގެ ހުރިހާ ކަމެއް ކޮށްފައިވަނީ ކެދިކޮޅުގައި މިހާރު ދިރިއުޅެމުން ގެންދާ ނ. މާފަރަށް އުފަން ޢަބުދުލްޤަނީގެ މާވަޑިކަމުގެ ދަށުން އޭނާގެ ގްރޫޕުންނެވެ.
އަޅުގަނޑަށް މުޢުތަބަރު ފަރާތަކުން މަޢުލޫމާތު ލިބިފައިވާ ގޮތުގައި މިދޯނި ބޭލުމަށްފަހު
މާލެއަށް ދަތުރެއްކޮށްލުމަށްފަހު ރިސޯޓަކާއި މިދޯނި ހަވާލު ކުރެވޭނެއެވެ.
މިއީ ފަތުރުވެރިންނަށް އަމާޒު ކުރެވިގެން ، މިފެންވަރުގައި ދޯންޔެއް މިފަސްގަޑުގައި ބަދެވުނު ފުރަތަމަ ފަހަރެވެ. މިފުރުޞަތުގައި ލަންދޫ އިންފޯ ޓީމުގެ ފަރާތުން މި ދޯނީގެ ވެރިޔާ އަލްފާޟިލް ޚާލިދު އަބޫބަކުރަށް ވަރަށް ހޫނު މަރުޙަބާއެއް ކިއަމެވެ.

ލަންދޫ ރކ ކޮމިޓީގެ ބައްދަލުވުމެއް ބާއްވައިފި

ލިޔުނީ : އަޙްމަދު ދާއޫދ

ު

ރކ ކޮމިޓީގެ ބައްދަލުވުމެއް ނުބޭއްވި ގާތްގަޑަކަށް ދޮޅުމަސްދުވަސް ވޭތުވެދިޔުމަށްފަހު ލަންދޫ ރކ. ކޮމިޓީގެ ބައްދަލުވުމެއް މިދިޔަ ހުކުރުދުވަހުގެ ރޭ ލަންދޫއޮފީހުގެ ޖަލްސާ ކުރާކޮޓަރީގައި ބާއްވައިފިއެވެ.

މިބައްދަލުވުމާއި ގުޅޭ އިތުރުމަޢުލޫމާތު ހޯދާލުމަށް ރކ.ކޮމިޓީއަށް މިއަހަރު ވަރަށްތަނަވަސް އަޣުލަބިއްޔަތަކުން ލަންދޫރައްޔިތުން އިންތިޚާބު ކޮށްފައިވާ އެއްބޭފުޅެއްކަމުގައިވާ ލަންދޫ އޮފީހުގެ ސެކެރެޓަރީ އަލްފާޟިލް ސަލީމް ޙުސެއިންއާއި އަޅުގަނޑު ފޯނުން ގުޅާލީމެވެ. އެބޭފުޅާ މަޢުލޫމާތު ދެއްވިގޮތުގައި މިރޭގެ ބައްދަލުވުމަށް އެޖެންޑާކުރެވިފައިވަނީ ލަންދޫގައި އުފެދިފައިވާ އެއްޖަމްޢިއްޔާ ކަމުގައިވާ ލަންދޫ ޔޫތު އެންކަރޭޖިންގ ސޮސައިޓީއިން އެޖަމްޢިއްޔާގެ ޢިމާރާތެއް ކުރުމަށްޓަކައި ބިމަކަށް އެދިފައިވާތީ އާއި ލަންދޫ ޒުވާނުން ގެ ފުޓްބޯޅަދަނޑު ރޭގަނޑު ގަޑިތަކުގައި ދިއްލުމަށް ރައްޔިތުންގެ އިންޖީނުގެއިން ކަރަންޓް ހޯދުމަށް އެދިފައިވާތީ އާއި، ރަށުގައި މީހުން އަލަށްއާބާދުވާ ގެތަކަށް ކަރަންޓް ގެންދިޔުމަށް ޑިސްޓިބިޔުޓަރ ފޮށިތަކެއް ބަހައްޓަންޖެހިފައިވާތީ އާއި ، ބަނދަރުސަރަޙައްދުގައި އަލަށްހެދި ފިނިމައިޒާނަށް ކަރަންޓްލުމަށް އެދިފައިވާތީ އާއި، ލަންދޫ އިންޖީނުގޭގައި ޑިއުޓީ އަދާކުރާ އެއްމުވައްޒަފު ކަމުގައިވާ އަޙްމަދު ފައިސަލް މިހާރަކަށްއައިސް ޑިޔުޓީއަށް ނުނިކުންނާތީއާއި މިކަންކަމާބޭހޭގޮތުން މެމްބަރުންގެ މެދުގައި ވާހަކަދައްކާ ގޮތެއްނިންމުމަށާއި، އަދި ލަންދޫރައްޔިތުންގެ އިންޖީނުގޭގެ ޚަރަދުރިޕޯޓް މެމްބަރުންނަށް އިއްވުމަށެވެ.

ލަންދޫއޮފީހުގެ ހިންގުންތެރި ސެކެރެޓަރީ އަލްފާޟިލް ސަލީމް ހުސެއިން ވިދާޅުވިގޮތުން ރކ.ކޮމިޓީގެ މިބައްދަލުވުމުގައި މެމްބަރުންގެ ފަރާތުން ފެނިގެންދިޔައީ ހީކުރިގޮތާ މުޅިން ޚިލާފުމަންޒަރުތަކެކެވެ. ކޮންމެ ކަމެއްފާސްކުރުމަށް ރިޔާސަތުން ވޯޓަށް އަހާލުމުން ފާސްވެގެން ގޮސްފައިވަނީ އިއްތިފާޤުން ނެވެ. ބައްދަލުވުން ބޭއްވުމުގެ ކުރިންހީކުރެވުނީ އެޖެންޑާ ކުރެވިފައިވާ ގިނަކަންތައްކަށް މެމްބަރުން އިދިކޮޅުހައްދަވާ ކަމެއްފާސްވިޔަ ނުދޭނެކަމަށެވެ. ސަބަބެއްކަމަށް އެބޭފުޅާ ވިދާޅުވީ މިއަހަރު އަލަށް އިންތިޚާބުކުރެވިފައިވާ ލަންދޫ ރކ.ކޮމިޓީގެ %90 މެމްބަރުންނަކީ ލަންދޫކަތީބު ނަޞީރުއާއި ދެކޮޅު ޚިޔާލުތައް ފާޅުކުރައްވާ ބޭފުޅުންކަމަށްވުމާއި އެކު މިރޭގެ ބައްދަލުވުމުގެ ރިޔާސަތު ބަލަހައްޓަވަން އިންނެވީ ވެސް ކަތީބު ނަޞީރު ކަމަށް ވުމެވެ. އަދި މިބައްދަލުވުމަކީ ދާދިފަހުން ނަޞީރު ލަންދޫކަތީބުކަމަށް ބަދަލުކުރެއްވި ފަހުން ބޭއްވި ރކ.ކޮމިޓީގެ ފުރަތަމަ ބައްދަލުވުމެވެ. ނަމަވެސް ބައްދަލުވުމުގައި އެއްވެސް ބޭފުޅަކު އިދިކޮޅު އެއްވެސް ޚިޔާލެއްފާޅުނުކުރައްވާ ކޮންމެ ކަމެއްވެސް ރިޔާސަތުން ބޭނުންވެލެއްވި ގޮތަށް ފާސްވެގެން ގޮސްފާ ވާ ކަން އެބޭފުޅާ ފާހަގަކުރެއްވިއެވެ. އަދި މިރޭފެނިގެން ދިޔައީ ފާއިތުވެ ދިޔައަހަރުތަކުގައިވެސް ލަންދޫ ރކ.ކޮމިޓީއިން ކަންކަންފާސްކުރުމަށް ރިޔާސަތުން ވޯޓަށް އަހާލުމުން ހަމަފެނިގެންދާ މަންޒަރުކަމަށް އެބޭފުޅާވިދާޅުވިއެވެ. އެންމެން އެއްފަހަރާ ލައްބަ ލައްބަ އަޅުގަނޑަށްފެނޭ އަޅުގަނޑަށްފެނެއޭ ގޮވާލާތަނެވެ.

ވެރިންނަށް ކިޔަމަންތެރިކަން އަދާ ކުރުމުގެ ގޮތުންނަމަވެސް ކަތީބު ބުނާހާގޮތަކަށް ބުނާހާ ބަހަކަށް ލައްބަ ކިޔަމުން އައި ކަމުގައިވިޔަސް ލަންދޫ ރކ.ކޮމިޓީއަކީ ދާދިފަހަކާ ޖެހެންދެންވެސް ( ވޭތުވެދިޔައަހަރުތަކުގައި ކޮމިޓީގައި ތިއްބެވި ) މެމްބަރުން އަމިއްލައަށް އިސްނަގައިގެން ރަށުގެ ތަރައްޤީއަށް އެކި އެކި ގޮތްގޮތުން ގިނަގުނަ މަސައްކަތް ތަކެއް ، އެބޭފުޅުން ޢަމަލީގޮތުން މަސައްކަތްތަކުގައި ބައިވެރިވެލައްވައިގެން ކުރައްވަމުން ގެންދެވި ކޮމިޓީއެކެވެ. އެގޮތުން ރަށުގެ އިރުމަތީފަރާތުގައި ހެދިފައިވާ ފިނިމައިޒާނަކީ މިބޭފުޅުންގެ ހީވާގި އެއް، މަސައްކަތް ކަން އަޅުގަނޑު ދެނަހުރީމެވެ. އަދިވެސް މިނޫނަސް އެކިއެކި މަސައްކަތްތައް ކުރައްވާފާ ހުންނާނެއެވެ.

ރކ.ކޮމިޓީގެ ބޭފުޅުންނަކި ރައްޔިތުންގެ ސިއްރުވޯޓަކުން އިންތިޚާބުކޮށްފާ ތިބޭ ބަޔަކަށްވާއިރު އަޅުގަނޑު ދެކޭގޮތުގައި އެބޭފުޅުންގެ ޛިންމާ އާއި ވާޖިބުތައް ވަރަށްބޮޑުވާނެއެވެ. ރައްޔިތުންނަށް ފައިދާހުރި އަދި ރަށުގެ ތަރައްޤީއާއި ތަހްޛީބަށް މަންފާކުރަނި އެންމެހައި ކަންތައްތަކުގައި އެބޭފުޅުންގެ ޙިއްސާ ވަރަށް ބޮޑުވާންޖެހޭނެއެވެ. ނަމަވެސް މިއަދު މިފެންނަނީ މުޅިންއެހެންމަންޒަރެކެވެ. އާއެކެވެ. އެވާހަކަތައް ދައްކާކަށް އަޅުގަނޑުނެތީމެވެ. ކޮންމެބޭފުޅަކުވެސް ބުނާބަހުގައި ތެދުވެރިވުންހުއްޓެވެ. އަދި ކުރާކަންތަކުގައި އޯގާވެރިވުން ހުއްޓެވެ.

ޕަސަންޓް ސްޕޯޓްސް ކްލަބުގެ ލޯގޯ ފަރުމާކޮށްފި

ލިޔުނީ : އަޙްމަދު ދާއޫދު

ޕަސަންޓް ސްޕޯޓްސް ކްލަބުގެ ލޯގޯ ( ފަރުމާކުރީ : ޝިނާން )ސ

ކޮންމެއަހަރެއްގެ އަޟްޙާ ޢީދާ ދިމާކޮށް ލަންދޫ ޒުވާނުން އިންތިޒާމްކުރާ ހޮލިޑޭ ކަޕްފުޓްބޯޅަ މުބާރާތަށް ޓީމްތަކުން ވަރަށްފޯރިޔާއެކު ތައްޔާރުވަމުންދާ ކަމުގެ މަޢުލޫމާތު ލަންދޫއިންފޯއަށް ލިބިއްޖެއެވެ.
އެގޮތުން މުބާރާތުގައި ބޭނުންކުރާނެ ޖަރޒީ ފަރުމާކުރުމުގެ މަސައްކަތް ތަކާއި މުބާރާތުގައި ޓީމު ތަކުން ޚަރަދުކުރުމަށް ފައިސާހޯދުމުގެ ގޮތުން ފަންޑްރައިސިންގ ޕްރޮގްރާމްތައް ކުރިއަށް އެބަގެންދެއެވެ.
މިމުބާރާތުގައި ބައިވެރިވެފައިވާ އެއްޓީމުކަމުގައިވާ ޕަސަންޓް ސްޕޯޓްސް ކްލަބުގެ މެމްބަރ އަލްފާޟިލް ޝިނާން ޢަބުދުލް ޣަނީ އާއި ވާހަކަދައްކާލުމުން ބުނުއްވީ މިހާރު އެޓީމްގެ ފަރާތުން ކުރަމުން ގެންދާ މަސައްކަތަކީ ރަށުންބޭރުގައި ވަޒީފާ ގައި ތިބި އެޓީމްގެ ކުޅުންތެރިންނާއި ވާހަކަދައްކައިގެން ޖަރޒީ ބައެއްފަރުމާ ކުރުމުގެ މަސައްކަތެވެ. އެގޮތުން މިހާރުވަނީ ލޯގޯ ނިމިފައިކަމަށްވެސް އެބޭފުާޅާ ބުނުއްވިއެވެ. އަދި މިހާރު ކުރިއަށްދަނީ އޮޅުވެލި ރިސޯޓްގައި ތިބި އެޓީމްގެ މުވައްޒަފުން ގުޅިގެން ޖަރޒީބައެއް ގަނެ އެ ޖަރޒީބައިގާ ލޯގޯ ޖެހުމުގެ މަސައްކަތް ކަމަށްވެސް ޝިނާން ބުނުއްވިއެވެ.
އަދި ފޮޓޯގައި ތިޔަފެނިވަޑައިގަންނަ ލޯގޯއަކީ މިފަހަރުގެ ހޮލިޑޭކަޕްގައި ޕަސަންޓް ސްޕޯޓްސް ކްލަބުން ބޭނުންކުރާނެ ލޯގޯ ކަމަށާއި ލޯގޯފަރުމާ ކުރީ ޓީމްގެ އެހެންބޭފުޅުންގެ ލަފަޔާ މަޝްވަރާގެ މަތިން ޝިނާން އަމިއްލައަށް ކަމަށް އެބޭފުޅާ ލަންދޫ އިންފޯއަށް ޝިނާން މަޢުލޫމާތު ދެއްވިއެވެ. ލަންދޫއިންފޯއިން އެދެނީ ހުރިހާޓީމަކުން ވެސް ދުރާލައި މުބާރާތަށް ތައްޔާރުވެ ކުރީގެ މުބާރާތްތައް ފަދަ ކުލަގަދަ އަދި އެއަށްވުރެވެސް ފޯރިގަދަ މުބާރާތަކަށް މިފަހަރުގެ މުބާރާތްވެސް ވެގެންދިއުމެވެ.

ބަނދަރުސަރަޙައްދުގައި އިތުރުފިނިމއިޒާނެއް ހަދައިފި

ލިޔުނީ : އަޙްމަދު ދާއޫދު

photo: mihas

ޒަމާނުއްސުރެ ލަންދުއަކީ އެއްބައިވަންތަ ރައްޔިތަކު ދިރިއުޅޭ ތަރައްޤީގައި އުސްމިންތަކަށް ވާޞިލްވުމަށް ގަދަމަސައްކަތްތަކެއް ކުރަމުން އަންނަ ރަށެށެކެވެ. އެގޮތުން އަތޮޅުގެ އެހެން ބައެރަށްރަށުގެ ނިސްބަތުން ޢުމްރާނީ ތަރައްޤީއާއި، އިޖްތިމާއީ ހޭލުންތެރިކަން ރަގަޅުވެފައިވާކަން އަޅުގަނޑު އުފަލާއެކު ފާހަގަކުރަމެވެ.
ކޮންމެއަހަރަކު ރަމަޟާން މަހާއި ދިމާކޮށް ރަށުގެ ދެފަރާތުގައި ( ހުޅަނގު ފަރާތާއި އިރުމަތީފަރާތް ) ހެދިފައިވާ ފިނިމައިޒާން ތައް މަރާމާތު ކޮށް ކުލަދަވާދުލައި ޒީނަތްތެރިކުރުމަކީ ލަންދޫރައްޔިތުން ވަރަށް ބޮޑުސަމާލުކަމެއްދީގެން ކޮންމެ އަހަރަކުވެސް ކުރަމުންއަންނަމަސައްކަތެކެވެ. އެގޮތުން މިއަހަރުވެސް މިހާރުމިވަނީ މައިޒާންތައް މަރާމާތު ކޮށް އަދި އިތުރުއެހެން ތަނެއްގައި ފިނިމައިޒާނެއް ހެދުމުގެ މަސައްކަތް ފަށާ ގާތްގަޑަކަށް މަސައްކަތުގެ %90 ނިމިފައެވެ.
ފޮޓޯގައި އެވާ ފިނިމައިޒާނަކީ ނުވަތަ ހޮޅުއަށްޓަކީ މިހާރު ފަޅުކޮންނަސަރަޙައްދުގައި ، އެސަރަޙައްދުގެ ދެކުނުފަރާތުގައި ތައްޔާރު ކުރެވިފައިވާ ތަނެކެވެ. ފަޅުހަދާ ސަރަޙައްދަށް ދާގިނަމީހުން މަޑުކޮށްލާ އަރާމްކޮށްލުމަށް އަދި ވަކިންޚާއްޞަކޮށް ރޯދަމަހު ރޯދަކުރުކޮށްލަށް ގޮސްތިބެލަން މި ފިނިމައިޒާނަކީ ވަރަށް ހިތްގައިމުތަނަކަށް ވެގެންދާނެއެވެ.
މިފަދަ ބޮޑު ކޮންމެމަސައްކަތަކީ ކޮންމެވެސް ބައެއްގެ އިސްނެގުމާއި މަސައްކަތުންނޫނީ ނުކުރެވޭނެ ކަމެއްކަން ކޮންމެބޭފުޅަކުވެސް ދަންނާނެވެ. އަދި މިފަދަކަމެއް ނިންމާލުމަށް ފުދޭވަރެއްގެ ބޮޑުޚަރަދެއްވެސް ހިނގާނެކަމީ ކަށަވަރުކަމެކެވެ. އެހެންކަމުން މިމަސައްކަތާއި ބެހޭގޮތުން އިތުރަށް މަޢުލޫމާތު އޮޅުންފިލުވާލުމަށް މިމަސައްކަތުގައި އުޅުއްވި ދެމީހަކާއި އަޅުގަނޑުވާހަކަދައްކާލީމެވެ. އެބޭފުޅުން ހާމަކުރެއްވި ގޮތުގައި މިސަރަޙައްދުގައި ހޮޅުއަށްޓެއް ހެދުމުގެ ޚިޔާލު އުފެދިންގެންއައީ ޖެޓީ ކޮޅުގައި ކުރިންހަދާފައިހުރި ހޮޅުއަށި ހަލާކުވުމާއި ގުޅިގެން ނެވެ.
ކޮންމެއަކަސް މަސައްކަތް ކުރާތަނަށް ގޮސްބަލާލުމުން ފެނުނީ މިމަސައްކަތުގައި އެންމެއިސްކޮށްއުޅުއްވަނީ ކުރިން އެ ހޮޅުއަށި ހެދުމުގައި ވެސް އެންމެއިސްކޮށް އުޅުއްވި ބޭފުޅުންކަމުގައިވާ މަހަމޫދުބެ އާއި އަބުދުއްރަޙްމާންބެ ، ޖަމާލު ، ބޮޑުބެސައިދު އަދި މުރިނގު ޚާލިދެވެ. މިނޫންނަސް މިސައްކަތުގައި ހައެއްކަ އަށެއްކަމީހުން އެކިގޮތްގޮތުން އެހީތެރިވެދީ މަސައްކަތް ކޮށްދެމުން އަންނަކަން އެނގިފައިވެއެވެ.
މިމަސައްކަތަށް ބޭނުންވާ ޚަރަދު ހޯދަނީ ކިހިނެއްތޯ އަހާލުމުން ލަންދޫ ގުލްދަމުގެ ޢުމަރުމޫސާ ބުނުއްވީ ތަންރޭނުމަށްބޭނުންވާ ސިމެންތި ދިނީ އެމް ޓީ ޓީ ސީ އިންކަމަށެވެ. އަދި ފުރާޅުގެ ޓިނު ދެއްވީ ރަށުއޮފީހުންކަމުގައެވެ. ދެން އެތަނުގައި ހަދާފާވާ ހޮޅުއަށްޓާއި ފުރާޅުހެދުމަށް ބޭނުންވާ ރުއްކެނޑީ ރައްޔިތުންގެ ރުއްގަހެވެ.
އަޅުގަނޑަށްމަޢުލޫމާތު ލިބިފައިވާގޮތުންގައި މިތަނަށް އެކިއެކި ތަކެތި ގަތުމަށް ފައިސާހޯދުމަށް ބުރުމާ ޤާސިމް އަރިހަށްވެސް ސިޓީއެއްފޮނުވާފައިވެއެވެ. އަދި މިސިޓީގެ ޖަވާބުގައި ، ރަށްކުރިއަރުވާ ކޮމިޓީ މެދުވެރިވެގެން އެހީހޯދަން އަތުވެއްޖެނަމަ -/15000 ރ. ދެއްވާނެކަމަށް ޤާސިމް ވިދާޅުވެފައިވާ ކަމަށް ، މިސިޓީހިފައިގެން ޤާސިމާއި ބައްދަލުކުރުމަށް ދިޔަ ލަންދޫ ގުލިސްތާނުގެ ޢަލީ އާދަމް އަޅުގަނޑު ގާތުބުނުއްވިއެވެ. މިތަންނިމޭއިރު ކޭބަލްޓީވީ ލެވިފައި ހުންނާނެކަމަށާއި ، މިކަމަށް ބޭނުންވާ ޓީވީ އާއި ކޭބަލް ދެއްވަނީވެސް ލަންދޫރައްޔިތުންނަށް ހެޔޮއެދޭ އަމިއްލަ ފަރާތްތަކުން ކަމަށް ވެސް އަޅުގަނޑަށް މަޢުލޫމާތުލިބިފައިވެއެވެ.

މުއައްސަސާ ތަކުގެވެރިންގެ ބައްދަލުވުމެއް ބާއްވައިފި

ޚަބަރު : އަޙްމަދު ދާއޫދު

އަލަށް ހަދަމުންދާމަގު ފޮޓޯ : އަންމަޑޭ

ލަންދޫގައި މިވަގުތުހުރި ސަރުކާރުގެ މުއައްސަސާ ތަކުގެވެރިންގެ ބައްދަލުވުމެއް ލަންދޫއޮފީހުން އިންތިޒާމް ކުރައްވައިގެން މިދިޔަ އާދިއްތަ ދުވަހުގެރޭ ލަންދޫއޮފީހުގެ ޖަލްސާ ކުރާ ކޮޓަރީގައި ބާއްވައިފިއެވެ. ލަންދޫއިންފޯއަށް މަޢުލޫމާތު ލިބިފައިވާ ގޮތުގައި މިބައްދަލުވުމުގެ އެންމެ ބޮޑު ބޭނުމަކީ ރަށުގައި މިހާރުންމިހާރަށް އިޖްތިމާޢީގޮތުން ކުރަންވެފައިހުރި ކަންތައްތަކަކީ ކޮބައިތޯ ބަލާ އެފަދަމަސައްކަތްތައް ރައްޔިތުންނާއި ނުބައްސާ ސަރުކާރުގެ އިދާރާތަކުގެ މުވައްޒަފުން ނެރެގެން ކުރެވިދާނެތޯ މަޝްވަރާކޮށް ހެދުމެވެ.
މިބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނު ކަންތައްތަކަކީ ރަށުގެ ދެކުނުފަރާތުން ޖެޓީއާދިމާއިން އަތިރިމައްޗަށް އޮތް މަގުގައި ހުރި ރުއްބުޑުތައް ނެގުމާއި އެމަގު ގެ ބޭނުންކުރެވޭ ވަރަށް އެމަގު ސާފުކުރުމާއި ބެހޭގޮތުންނާއި، ރަށުގެ ދެފަރާތުގައި ހެދިފައިހުރި ފިނިމައިޒާންތަކުގެ އާބާތުރަ ފިލުވުމުގެ ގޮތުން ދަވާދާއި ކުލަލުމާއި އަދި އެފަދަތަންތާންގައި ހަދާފައިހުރި ޖޯލިފަތި ތަކުގައި ދަވާދުލައި ޖޯލިތައް ގެތުމާއި، އަދިވެސް ، ހިގާމީހުންނަށާއި ދުއްވާއެއްޗިއްސަށް އުދަގޫވާ ވަރަށް ރަށުގެމަގުތަކުގއި ތިރިކޮށްހުރި ގަސްތަށް ކޮށާ، ރަށުތެރެ ސާފުކުރުމުގެ މަސައްކަތް ކަތްތަކާއި ބެހޭގޮތުންނެވެ.
މިމަސައްކަތްތައް ސަރުކާރު މުވައްޒަފުންލައްވާ ކުރުވުމާއި މެދު މިބައްދަލުވުމަށް ޙާޟިރުވެލެއްވި ބޭފުންގެ ތެރޭގައި ކޮންމެވެސް ވަރަކަށް ޚިޔާލުތަފާތުވުން އުފެދުނު ކަމުގެ މަޢުލޫމާތުވެސް ލަންދޫއިންފޯއަށް ވަނީ ލިބިފައެވެ. އެފަދަ ބޭފުޅުންގެ ޚިޔާލު ހުރިގޮތުން މިފަދަ އިޖްތިމާޢީ މަސައްކަތްތައް އަބަދުވެސް ލަންދޫގައި ކޮށްފައިވަނީ ރައްޔިތުންގެ ގޮތުންކަމާއި އަދި ރޯދަމަސް މިހާ ކައިރިވެފައިވަނިކޮށް ހުސްއެކަނި މުވައްޒަފުންނެރެގެން މިހާގިނަ އަދި ބޮޑެތިމަސައްކަތްތަކެއް ކުރިއަށް އޮތް ބަންދު ދެދުވަހުން ނިންމައެއް ނުލެވޭނެއެވެ.
ލަންދޫކޯޓުން ފިޔަވައި ލަންދޫގައި މިވަގުތު ހުރި ސަރުކާރުގެ ހުރިހާ މުއައްސަސާ ތަކުގެއިސްވެރިން ބައިވެރިވެލެއްވެވި މިބައްދަލުވުން ނިންމާލީ ކޮންމެ މުއައްސަސާ އަކުންވެސް އެމުއައްސަސާއެއްގެ މުވައްޒަފުންނާއި ވަކިންބައްދަލުކޮށް މުވައްޒަފުންގެ ޚިޔާލުހުރީ ކިހިނެތްތޯ ބެލުމަށްފަހު މިމަސައްކަތްތައް ކުރާނެ ވަކިގޮތެއް ނިންމުމަށެވެ.ކޮންމެބަޔަކު ނިކުމެގެންނަމަވެސް މިހާރުން މިހާރަށް ނިންމަންޖެހޭ ބައިވަރު މަސައްކަތްތައް ލަންދޫގައި މިވަގުތު ހުރިކަން ލަންދޫއިންފޯއިންވެސް ފާހަކުރަމެވެ . އެގޮތުން ނ.އަތޮޅުގައި ރިސޯޓެއް ހުޅުވި އަޅުގަނޑުމެންގެ އަތްފޯރާ ފަށަށް ޓޫރިޒަމް އައިއިރު ލަންދޫ މާބުދުގެ ސަރަޙައްދު ޓޫރިސްޓުންގެ ޝައުޤުވެރިކަން އެތަނާދޭތެރޭ އުފެދޭ ގޮތަށް ތައްޔާރުކޮށްނުލެވުނުކަމީވެސް ލަންދޫއިންފޯއިން ފާހަގަކޮށް ލަންދޫރައްޔިތުންގެ ފައިދާއާއި މަންފާއަށް އެދޭ ޓީމެއްގެ ހައިސިއްޔަތުން ހިތާމަކުރާކަމެކެވެ.

ރަތްދޫލައިގެ މަރުޙަބާ.......!؟

ފޮޓޯ : ލައިބް

ނ.ލަންދޫ މާހާ މުޙައްމަދު ޢަބުދުﷲ އާއި ، އޭނައިގެ އެކުވެރިން މިދިޔަ ހުކުރުދުވަހު ކުއްލިގޮތެއްގައި ލަންދުއަށް އައުމުން ލަންދޫ ޖެޓީމަތިން އޭނާއަށް ވަރަށް ހޫނު މަރުޙަބާއެއް ކިޔައިފިއެވެ. ވަރަށްކުއްލި ގޮެތެއްގައި މުޙައްމަދު ޢަބުދުﷲ ލަންދުއަށް އަންނަކަމުގެ މަޢުލޫމާތު ލަންދޫއަށް އިންފޯއަށް ލިބުމުން މިކަމާ ބެހޭ އިތުރުމަޢުލޫމާތު ހޯދާލުމަށް ރަށުގެ ރައްޔިތުންގެ ތެރެއިން ދެތިންމީހަކާ ސުވާލުކޮށް ލުމުން އެނގުނީ މުޙައްމަދު ޢަބުދުﷲ އާއި އޭނައިގެ ބައިވެރިން ކުއްލިގޮތެއްގައި ލަންދުއަށް މިޖައްސާލަނީ ލަންދޫ ކަތީބު އަލްފާޟިލް ޙަސަން ނަޞީރު އަނެއްކާވެސް ލަންދޫ ކަތީބު ކަމާއިގެން ލަންދުއަށް ދުރުވެ ލަންދޫއޮފީސް ހިންގުމާއި ޙަވާލުވެލެއްވުމާއި ގުޅިގެން އެކަން ފާހަގަކޮށް އެކަމުގެ އުފާފައުޅުކުރުމަށެވެ.
ލަންދޫއިންފޯއަށް މަޢުލޫމާތު ލިބިފައިވާ ގޮތުގައި ނަޞީރު ލަންދޫކަތީބު ކަމުން ދުރުކުރުމަށް ލަންދޫގައި އުފެދުނު ޙަރަކާތުގެ އެންމެ އިސްބޭފުޅެއްގެ ގޮތުން ވެސް ކުރިންހުންނެވީ ލަންދޫ މާހާ މުޙައްމަދު ޢަބުދުﷲ އެވެ. އެދުވަސްވަރު އެކި ގޮތްގޮތުން ނަޞީރު އަށް އުދަގޫކޮށް ވެރިކަމުން ދުރުކުރުމަށް ޓަކައި އޭރުގެ އެޓޯލްސް މިނިސްޓަރ ވަހިއްދީން ގެ އަރިއަހަށްވެސް އެންމެ ގިނަޢަދަދަކަށް ނަޞީރާއި ބެހޭގޮތުން ޝަކުވާގެބޮޑެތި ޖިޒީތައް އުފުލުމުގެ އެންމެ މުގުލުގައި ވެސް ހުންނެވީ މިދެންނެވި މުޙައްމަދު ޢަބުދުﷲ ކަމަށް ލަންދޫ ގެ ވަރަށް ގިނަރައްޔިތުން ބުނަމުންދެއެވެ.
ކޮންމެއަކަސް މިއަދު މިފެންނަނީ އެކޮޅުމިކޮޅުން ޖެހިފައިވާ ކަހަލަ މަންޒަރެކެވެ. ލަންދޫއިންފޯއަށް ލިބިފައިވާ އެވާ ފޮޓޯ ތަކުގައި އެވާފަަދައިން ، މުޙައްމަދު ޢަބުދުﷲ ލަންދުއަށް އަންނަ ޚަބަރު ލަންދޫކަތީބު ނަޞީރުއަށް ތާއީދު ކުރާ ފަރާތްތަކަށް ލިބުމާއި ގުޅިގެން ޖެޓީއާއި ވައްްގެ ތައްޔާރު ކުރުމުގެ މަސައްކަތް ވަރަށްފޯރީއާއި އެކު ދިޔައީ ކުރެވެމުންނެވެ. ކުދިން ޚިތާނު ކުރާއިރު ދަމާވައްތަރުގެ މާފަތިތަކުން ނާއި ތަފާތު ވައްތަރުގެ މާމެލާ މެލިން ވައްގެ އާއި ޖެޓީ ޒީނަތްތެރި ކުރެވެމުން ދިޔައި ބަޔަކު ހައިރާންވާހާ މަތީފެންވަރަކަށެވެ. މިޒަމާނުގައި ސަރުކާރުގެ މިނިސްޓަރަކު ރާއްޖެތެރޭގެ ރަށަކަށް ވަޑައިގެންނެވިއަސް މިފަދައަކުން ތައްޔާރު ކުރެއެކޭ އަޅުގަނޑަކަށް ނުދެންނެވޭނެއެވެ. މިދިޔަ އަހަރު އެޓޯލްސް މިނިސްޓަރ ވަހިއްދީން ލަންދުއަށް ވަޑައިގެންނެވި ދުވަހުވެސް ޒީނަތްތެރި ކުރުމުގެ ގޮތުްން ނުވަތަ މަރުޙަބާ ކިޔުމުގެގޮތުން އެއްވެސް ކަމެއް ކުރިއެކޭ ނުދެންނެވޭނެއެވެ. އެދުވަހު މުޅިރަށުގައި ޚާއްޞަކޮށް އަތިރިމަތީގައި އެއްއަޑަކަށް ގުގުމާލައިފާ ހުރީ ނަޞީރުގެ އިސްތިއުފާއަށް އެދި ގޮވަމުން ދިޔަ އަޑެވެ. ކޮންމެ މީހަކު އަތުގައި އޮންނަނީ ނަޞީރުއާއި އިދިކޮޅު ޢިބާރާތްތައް ލިޔެފައިވާ ބުރިސިލްބޯޑެކެވެ. ނުވަތަ އެފަދަ އެހެންވެސް ބެނާ އެކެވެ. ބޮލުގައި ނުވަތަ އަތުގައި އައްސާލެވިފައި ވަނީ ރަތް ކުލައިގެ ފޮތި ކޮޅެކެވެ.
މުޙައްމަދު ޢަބުދުﷲ އާއި އޭނައިގެ ބައިވެރިން ޖެޓީއަށް ފޭބެންނެވުމާއި އެކު ކޮންމެ ބޭފުޅަކަށްވެސް މަރުޙަބާ ކިޔުމުގެ ގޮތުން މާބޮނޑިއެއް އެރުވުނެވެ. އަދި ވައްގެއާއި ހިސާބުން ދަނބުރުކު ކުރުބަލުން ވެލްކަމް ޑްރިންކް ފޯރުކޮށްލެވުނެވެ.
މުހައްމަދު ޢަބުދުﷲ އާއި އޭނައިގެ ބައިވެރިން ނަށް މަރުޙަބާ ކިޔުމަށް ތައްޔާރު ވަމުންދިޔަ ލަންދޫކަތީބު ނަޞީރު އަށް ތާއީދު ކުރާ ފަރާތް ތަކުން އޮޅިގެންނަމަވެސް އެދުވަހު ކުރި އެންމެ ހެއްވާ، ލަދުގަނަންޖެހޭ، ފެންވަރުދަށް ކަމަކީ ލަންދޫގެ ފަޚުރެއްކަމުގައި މިހާރު ވެސް ގިނަބަޔަކު ޤަބޫލްކުރާ ، ލަންދޫގެ މޫނުމަތި ފަޅުފިލުވާދޭ އަދި ރަށަށް އަރާ ސަފަރުވެރިންނާއި ، ޢިއްޒަތްތެރިން ނަށް އެންމެފުރަތަމަވެސް ބައްދަލުކުރާ 400 ފޫޓް ދިގު ބޮޑުޖެޓީގެ އެކި ހިސާބު ތަކުގައި އިނގިރޭސިބަހަށް ނިސްބަތްވާ ޢިބާރާތެއް ރޯ ނުބައިކޮށް ސްޕްރޭކޮށްގެން ލިޔުނުކަމެވެ. މިފަދަ ޒަމާނެއްގައި ބަޔަކު ނިދާފަ ތިބެގެން ވެސް މިވަރުގެ ސިމްޕަލް އެއްޗެއް ރޯ ނުބައިކޮށް ލިޔުނު އަޑު އަދި އަޅުގަނޑު ނާހަމެވެ. އިނގިރޭސި ބަހުގެ އެކި އެކި ޑިކްޝަނަރީ ތައް ހޯދާ ހޯދާ ވަރުބަލިވެއްޖެއެވެ. ޖެޓީ މަތީގައި ލިޔެފައިވާ ޢިބާރާތް ނުވަތަ އެ ބަސް އަދި އަޅުގަނޑަކަށް ނުފެނެވެ. އަޅުގަނޑަށް މިބެލެނީ އަދި މުޅިން ރަނގަޅަށް ނޫންކަމަށް ވެސް ވެދާނެއެވެ. އެހެންކަމަށް ވާނަމަ މާފަށް އެދެމެވެ.އަޅުގަނޑުގެ އިލްތިމާސަކީ ދެންފަހަރަކުންވެސް މިފަދަ ލިޔުމެއް ތަނެއްގައި ލިޔެ ހަރުކޮށް ހަދާނަމަ ކޮންމެވެސް ވަރަކަށް ވިސްނާލައި އެންމެ ކުޑަމިނުން ސްޕެލިންގ ރަނަގަޅުތޯ ، އެވަރު ދަންނަ މީހަކު ކައިރީ އަހާލުމަކީ ދެރަކަމެއް ކަމުގައި ނުދެކުމެވެ. އަދި މިހާތަނަށް އެފަދަ ލިޔުމެއް ލިޔެވިފައިވާނަމަ އަވަހަށް ގިނަބަޔަކަށް ނުފެންނަނީސް ކުރިންވެސް ފޮހުނު ފަދައިން އެހެންކުލައެއްގެ ދަވާދުން ސްޕްރޭކޮށްގެން ފިލުވާލުން ވަރަށް ބުއްދިވެރިއެވެ.

ވަގުތީ ގޮތުން ނަމާދުކުރުން ހުއްޓާލައިފި

ލިޔުނީ : އަޙްމަދު ދާއޫދު

މަސްޖިދުލް ބަރަކާތު ( ފޮޓޯ ؛ އަންމަޑޭ )ސ

ރަމަޟާން މަހަށް ތައްޔާރު ވުމުގެ ގޮތުން ރަށުގެ މިސްކިތްތައް ކުލަޔާއި ދަވާދުލައި ޒީނަތްތެރި ކުރުމުގެ މަސައްކަތް ފަށައިފިއެވެ.
އަދި މިމަސައްކަތްތައް ނިމެންދެން ލަންދޫ ހުކުރުމިސްކިތުގައި ވަގުތީގޮތުން ނަމާދު ކުރުން ހުއްޓާލައިފި ކަމަށް ލަންދޫ އޮފީހުން އިޢުލާން ކުރައްވައިފިއެވެ. އެހެންކަމުން ދެން މަސައްކަތްތައް ނިމެންދެން ފިރިހެނުންވެސް ނަމާދުކުރާނީ އަންހެނުން މިސްކިތް މަސްޖިދުއްނަޞުރުގައި ކަމަށް ވެސް މިއިޢުލާންގައިވެއެވެ. ނަމަވެސް ހުކުރު ކުރަނީ ހަމަ ކުރިއެކޭވެސް އެއްގޮތަށް މަސްޖިދުއްލުބާބުގައި ކަމަށްވެސް ލަންދޫއޮފީހުން މިއިޢުލާންގައި ހާމަކުރައްވާފާ ވެއެވެ.
އެސްޓީމޭޓްގެ އުސޫލުން މުޅިރަށަށް އިޢުލާންކޮށްގެން މިމަސައްކަތް ތަކާއި ރަށުގެ އެކި ގްރޫޕްތައް ޙަވަލުވެގެން ވަރަށް ހަލުވިކަމާއި އެކު މަސައްކަތް ކުރިއަށް އެބަގެންދެއެވެ.
މިމަސައްކަތާއި ހަވާލުވެގެން އެއްފަރާތް ކަމުގައިވާ ލަންދޫ ހީނާވިލާ ޢަބުދުއްރައްޒާޤު އާއި ލަންދޫއިންފޯއިން މަޢުލޫމާތު ހޯދާލުމުގެ ގޮތުން ސުވާލުކޮށްލުމުން އޭނާ ބުނީ އަތިރީ މިސްކިތުގެ ކުލަދަވާދުލުމުގެ މަސައްކަތާއި ޙަވާލުވީ -/4600 ރ. އަށް މިމަސައްކަތްކުރާގޮތަށްކަމަށެވެ. އޭނާއާއި އެކު އެމަސައްކަތުގައި ދެން ބައިވެރިވަނީ ލަންދޫ ވައިޖެހޭގެ އަޙްމަދު އިބްރާހީމް ( ޠާމާ އަޙަންމަދު ) އެވެ.
ހުކުރު މިސްކިތުގައި ކުލަދަވާލުމުގެ މަސައްކަތް ކުރަނީ ކާކުތޯ އަހާލުމުން ޢަބުދުއްރައްޒާޤު ބުނީ އެމަސައްކަތް ކުރަނީ -/6000 ރ. އަށް ލަންދޫ ޖައްވު އިބްރާހީމް ޒަކަރިއްޔާ ކަމުގައެވެ. އެމަސައްކަތުގައި އިތުރު އެހެންމީހަކު އުޅޭކަމުގެ މަޢުލޫމާތު ލަންދޫއިންފޯއަށް އަދި ލިބިފައެއް ނެތެވެ.
ލަންދޫއިންފޯއަށް މަޢުލޫމާތު ލިބިފއިވާ ގޮތުގައި މިސްކިތުގައި ކުލަލުމުގެ މަސައްކަތަކީ ވަރަށްކުރިންވެސް ރޭވި ރަމަޟާން މަސްއައުމުގެ ކުރިން ނިންމާގޮތަށް ލަންދޫއޮފީހުން ކަނޑައޅާފައިވާ ޕްރޮޖެކްޓެކެވެ. ލަންދޫއިންފޯއިން އުންމީދުކުރަނީ މިސްކިތްތަކުގައި ކުލަޔާއި ދަވާދު ލުމުގެއިތުރުން މިސްކިތްތަކުގައި މިހާރުން މިހާރަށް ކުރަންހުރި އެހެނިހެން މަރާމާތުތައްވެސް ލަސްނުކޮށް އަވަސްފުރުޞަތެއްގައި ކުރެވިގެން ދާނެކަމަށެވެ. އެގޮތުން މަސްޖިދުއްލުބާބުގެ ވަށާފާރަކީ މިހާރު ހުރިހާލަތަށް ވިސްނާއިރު މިޒަމާނަށްނުފެތޭ މިންވަރަށް ބައުވެފައިވާ ވަށާފާރެއްކަންވެސް ލަންދޫއިންފޯއިން ފާހަގަކުރަމެވެ .

ނަތީޖާ ދޫކޮށްފި

ލިޔުނީ : މޫސާ ޙުސެއިން ( މިހާސް )ސ

Email: moosa.goma@yahoo.com

ލަންދޫސްކޫލް ގެދަރިވަރުން އެސެމްބްލީއޭރިޔާގައި ( ފޮޓޯ: ޒީރޯ ) ސ

ލަންދޫ ސްކޫލްގެ ދެވަނަ ސެމިސްޓާރގެ ފުރަތަމަ ކުލާސް ޓެސްޓްގެ ޕޭޕަރދޫކުރުމާއި ނަތީޖާދޫކުރުން ވޭތުވެދިޔަ ހަފްތާގައި ބާއްވައިފިއެވެ.
މިގޮތުން ސެކަންޑަރީ ގްރޭޑްތަކުގެ ހުރިހާ ދަރިވަރުންނަށް އެދަރިވަރުންގެ ބެލެނިވެރިންގެ ހާޟިރުގައި ޕޭޕަރުތައް މިހާރުވަނީ ދޫކޮށް ނިމިފައިކަމުގައި ލަންދޫ ސްކޫލުން މަޢުލޫމާތު ދެއްވައެވެ.
ވޭތުވެދިޔަ އަހަރު ފުރަތަމަ ފަހަރަށް ޖީ.ސީ.އީ.އޯލެވެލް އާއި އައި.ޖީސީ.އެސް.އީ އަދި އެސް.އެސް.ސީ އިމްތިހާން ހަދަންފެށި މިސްކޫލްގެ ދަރިވަރުންނަށް އެންމެފަހުން މިނެގުން ކްލާސް ޓެސްޓްތަކުން އެކަށޭނަ ރަނގަޅު ކުރިއެރުންތަކެއް ހާޟިލްވެފައިވާ ކަމުގައިވެސް ލަންދޫ ސްކޫލުން ހާމަކުރައްވައެވެ.
ލަންދޫ ސްކޫލުން އިތުރަށް ހާމަކުރައްވާ ގޮތުގައި މިއަހަރު އެސްކޫލްގެ އެންމެބޮޑު އަމާޒަކީ ވޭތުވެދިޔަ އަހަރު ޖީ.ސީ.އީ.އޯލެވެލް އަދި އައި.ޖީ.ސީ.އެސް.އީ އިމްތިހާނުން ސްކޫލަށް ލިބުނު ރަނގަޅު ނަތިޖާ އިތުރަށް ރަނގަޅުކޮށް އޭޕީސްކޯއިން އެޑިޔުކޭޝަނުން އެދެއްވާ ތަށި ނ.ލަންދޫ ސްކޫލަށްވެސް ހޯދުމެވެ.
މިމަޤްޞަދު ހާޞިލުކުރުމަށްޓަކައި ޚާއްޞަކޮށް މިއަހަރު ގްރޭޑް 10ގައި ކިޔަވަމުންދާ ދަރިވަރުންނަށް އަމާޒްކުރެވިގެން ބެލެނިވެރިންގެ އެއްބާރުލުމާއި ޓީޗަރުންގެ އަމަލީ ފުރިހަމަ ބައިވެރިވުންލިބިގެން ވަރަށް ގިނަގުނަ ޕްރޮގްރާމްތަކެއް މިހާރުވެސް ހިންގަވަމުން ގެންދަވާކަމުގައި ނ.ލަންދޫ ސްކޫލުން މަޢުލޫމާތު ދެއްވައެވެ.

ތަންކޮޅެއްލަސްވެސް ވެއްޖެދޯ !؟

ލިޔުނީ : މޫސާ ޙުސެއިން ( މިހާސް ) ސ

Email: moosa.goma@yahoo.com

ލަންދޫން ހޮވާލެވުނު ޓީމް

" ޗެލެންޖު " ޓީމް ފޮޓޯ : މިހާސް

މި ބުލޮގު ގައި ލަންދުއަށް އުފަން ލަންދޫ ދެކެ ލޯބިވާ ދަރިޔަކު ބުނެފައިވާ ފަދައިން
ލަންދުއަކީ ފުޓްބޯޅައިގެ ރަށެކެވެ. ދެހަފްތާއިން އެއްހަފްތާކަހަލަ ގޮތަކަށް ވާދަވެރި ކަމުގެ ކޮންމެވެސް މެޗެއް ލަންދޫގެ ޒުވާނުންގެ ފިޓްބޯޅަ ދަނޑުގައި ކުޅެވޭނެއެވެ. ދެތިން ހަތަރު މުބާރާތް އަހަރެއްގެ ތެރޭގައި ރަށުގައި ބޭއްވޭނެއެވެެ. އަތޮޅުގެ ރަށްތަކަށް ހުޅުވާލައިގެން ބޭއްވޭ ހުރިހާ މުބާރާތްތަކެއްގައި މިރަށުގެ ޓީމްތައް ބައިވެރިިވެ ރަނގަޅުކާމިޔާބީ ތަކެއް ހޯދާނެއެވެ.
މިގޮތުން ކުރިޔަށް އޮތް ހޮލިޑޭކަޕަށް ތައްޔާރު ވުމުގެ މަސައްކަތްތައް ޢަމަލީގޮތުން ފެށުމުގެ
ގޮތުން މިދިޔަ ހުކުރު ދުވަހު ކުޅެވުނު އެކުވެރި ކަމުގެ މެޗަކީ ވަރަށް ފާހަގަ ކޮށްލެވޭ މެޗެކެވެ. މިމެޗުގައި އެއްކޮޅުން ބައްދަލްކުރީ މި މުބާރާތުގައި ވާދަ ކުރާނެ އެއްޓީމް ކަމުގައިވާ ސައިފް ގެ " ޗެލެންޖު " ޓީމެވެ. އަނެއްކޮޅުން ބައްދަލްކުރީ ލަންދޫ ހޮވާލެވުނު ޓީމެކެވެ. ވަރަށް ފޯރިގަދަ ކުޅުމަކަށް ފަހު މިމެޗު 1 ލަނޑު 2ލަނޑުން ކާމިޔާބު ކުރީ ލަންދޫން ހޮވާލެވުނު ކުޅުން ތެރިން ހިމެނުނު ޓީމެވެ. ހޮވާލެވުނު ޓީމުން ލަނޑު ޖަހާފައިވަނީ އަޙްމަދު ރަޝީދު ( ލައިބު ) އާއި ޔޫސުފް ޢަބުދުއްރަހީމް ( ޔޫއްޓޭ ) އެވެ. " ޗެލެންޖު ޓީމުން ލަންޑު ޖެހީ މުޙައްމަދު ސަމާޙް ( ސަމައްޓޭ ) އެވެ. މުޅި މެޗު ކޮންޓްރޯލްކޮށް ރަނގަޅަށް ކުޅެފައިވަނީ ޒުވާން ކުޅުންތެރިން ތަކެއްހިމެނޭ " ޗެލެންޖު " ޓީމެވެ. މި މެޗުގައި " ޗެލެންޖު " ޓީމުން ދެއްކި ކުޅުމަށް ބަލާފައި ބުނެވޭނީ މިއަހަރުގެ " ހޮލިޑޭކަޕް " ވެގެންދާނީ ވަރަށް ފެންވަރު ރަނގަޅު ފޯރިގަދަ މުބާރާތެއް ކަމުގައެވެ. އަޅުގަނޑުމެން ބޭނުންވާ ގޮތަކީވެސް މިއީއެވެ.

ޑޮކްޓަރ ޙަސަން ސަޢީދު ލަންދުއަށް

ލިޔުނީ : އަޙްމަދު ދާއޫދު

ޙަސަން ސަޢީދު ލަންދޫ ވައްގޭގައި ( ފޮޓޯ : ޔޫއްޓޭ )ސ

ކުރީގެ ބަންޑާރަ ނައިބު ޑރ.ޙަސަން ސަޢީދު ކުރިއަށް އޮތް ރިޔާސީ އިންތިޚާބުގެ ކެންޕެއިން ދަތުރުފުޅުގައި ނ.އަތޮޅުގެ ގިނަރައްތަކަކަށް ކުރެއްވި ދަތުރުފުޅުގެ ތެރެއިން މިދިޔަ ހުކުރުދުވަހު ލަންދޫއަށްވެސް ވަޑައިގަންނަވައިފިއެވެ. ލަންދޫގެ ގިނަޢަދަދެއްގެ ޒުވާނުން ޑރ.ޙަސަން ސަޢީދު ވަޑައިގެންނެވި ތަނަށް އަތިރިމައްޗަށް ދިޔައެވެ.
ލަންދޫ ސަފާރީގެ މަހަމޫދު މުޙައްމަދު ލަންދޫޒުވާނުންނައި ބައްދަލުކޮށްލަން ބޭނުންވާތީ ވައްގެއަށް ޙާޟިރުވުމަށް އެދި ހުކުރުދުވަހު ހެނދުނު ރަށުއޮފީހުގެ ލައުޑުސްޕީކަރުން ، ގޮވާފާ ވެއެވެ. ފަހުން އެނގުނުގޮތުގައި މިއީ އެދުވަހުގެ ހެނދުނު 9:45 ގައި ޑރ.ޙަސަން ސަޢީދު ލަންދުއަށް ވަޑައިގަންނަވާތީ އެބޭފުޅާގެ ވާހަކަފުޅު އަޑުއެހުމަށް ޒުވާނުންނާއި ރައްޔިތުން އެއްކުރުމުގެ ގޮތުން ކުރިކަމެއްކަމަށް ވަނީ އެނގިފައެވެ.
އެތަނަށް ޙާޟިރުވި ގިނަމީހުން ޑރ.ޙަސަން ސަޢީދު ބައްދަލުކޮށް ސަލާމް ކޮށްވެސް ހެދިއެވެ. އަދި ބައެއްމީހުން އެކިކަންމަށް އެދި ހަސަން ސަޢީދަށް ހުށައެޅިއެވެ. އެގޮތުން މިހާރު ލަންދޫގެ ބަދަރުސަރަހައްދުގައި އަލަށް ހަދާ ހޮޅުއަށްޓަށް އެހީއެއް ވެދޭތޯ ރައްޔިތުންގެ ނަމުގައި އެދުނެވެ. ޖަވާބުގައި ޑރ.ޙަސަން ސަޢީދު ވިދާޅުވީ އޭނާ ވަޑައިގަތީ ފައިސާ ދޭން ނޫންކަމަށާއި ހަމައެކަނި ރައީސްކަމަށް ކުރިމަތި ލެއްވިކަން މިރަށުގެ ރައްޔިތުންނަށް ހާމަކޮށް ދީ ސިޔާސަތު ހާމަކޮށްދިނުމަށް ކަމަށެވެ. އަދި ފައިސާގެ އެހީއަށް އެދެން ރަގަޅުވާނީ ބުރުމާ ގާސިމް ވަޑައިގަންނަވާ ދުވަހުކަމަށްވެސް ވިދާޅުވިކަމަށް ވެއެވެ.
ކޮންމެއަކަސް ރައްޔިތުން މިއެދުނު އެދުމުގެ މަތިން ޒުވާނުނަށް -/500 ރ. އަދި ހޮޅުއަށްޓަަަށް -/2500 ރ. ދެއްވިކަމަށް ލަންދޫއިންފޯއަށް މަޢުލޫމާތު ލިބިފައިވެއެވެ. ނަމަވެސް މިފައިސާ ދެއްވީ ޑރ.ޙަސަން ސަޢީދު ނޫންކަމަށާއި ، ފައިސާދެއްވީ އެދަތުރުފުޅުގައި ހަސަން ސަޢީދު އާއި އެކު އުޅުއްވާ ކުޑަފަރި އަޝްރަފް ޢަބުދުއްރަޙީމް ކަމުގައި ، މިފައިސާ ހޯދުަމަށް އެތަނަށް ދިޔަ އެކަކުކަމުގައިވި ލަންދޫ އަޅިވިލާގެ ޙަސަން ޙުސެއިން ލަންދޫއިންފޯއަށް މަޢުލޫމާތު ދެއްވިއެވެ.
ޙަސަން ސަޢީދުގެ ދަތުރުފުޅުގެ ކަންތައްތައް ލަންދޫގައި ހަމަޖެއްސުމުގައި އެންމެ އިސްކޮށް އުޅުއްވީ ސަފާރީގެ މަޙަމޫދު މުޙައްމަދު ކަމުގައި ލަންދޫއިންފޯއަށް ވަނީ ކަށަވަރުވެފައެވެ.

މާފަރު ހެލްތް ސެންޓަރގައި ބޭސްވިއްކަނީ

ލިޔުނީ ؛ އަޙްމަދު ދާއާދު

މާފަރުހެލްތްސެންޓަރ ( ފޮޓޯ : ޙަސަން )ސ

މާފަރަށް ޑޮކްޓަރަކު ސަރުކާރުން ހަމަޖެއްސެވި ދުވަހުން ފެށިގެން މާފަރުރައްޔިތުންނަށް ޢާއްމު ޚިދުމަތެއް ދިނުމުގެ މަޤްޞަދުގައި ލިބޭފައިދާއަކަށްވުރެ ބޮޑަށް ރައްޔިތުންގެ ބޭނުންތައް އިސްކޮށްގެން އަމިއްލަ ފަރުދަކު ޑޮކްޓަރީ ބޭސް މާލެއިން ގެނެސްގެން މާފަރު ހެލްތްސެންޓަރގައި ވިއްކަމުން ގެންދިޔައީ މީގެދުވަސްކޮޅެއްކުރިން ރައްޔިތުންގެ ވަރަށްގިނަބައެއްގެ ރުހުމާވެސް އެކު ކޮންމެބޭސްސިޓީއެއް ހިފައިގެން އަތޮޅުގެވެރިކަންކުރާ ރަށަށް ބޮޑުޚަރަދުކޮށްފާ ބޭސްގަންނަން ދާންނުޖެހޭތީ ވަރަށް އަމާންކަމާއި އޮމާންކަމާއި އެކު ހިތްހަމަޖެހިގެން ކަމަށް މިބޭސްވިއްކުމުގައި އެންމެއިސްކޮށް އުޅުއްވި އެއްބޭފުޅަކު ލަންދޫއިންފޯއަށް މަޢުލޫމާތުދެއްވިއެވެ.
މިގޮތަށް މާލެއިންބޭސްގެނެސްގެން ހެލްތްސެންޓަރގއި ބޭސްބެހެއްޓުމުގެ ހުއްދަހޯދައިގެން ބޭސްވިއްކަންފެށީ ވަގުތުންވަގުތައް ޑިސްޕެންސަރީއެއް ހަދަން ފުދޭވަރެއްގެ ބޮޑުޚަރަދެއް ހިނގާނެތީއާއި، މީގެދިހަވަރަކަށް މަސްކުރިން މަހުކުއްޔަށް ދޫކުރަން ރކ ކޮމިޓީން ނިންމާފައިވާ ރައްޔިތުންގެ ޢިމާރާތް ލިބުންލަސްވެގެން ކަމަށްވެސް އެބޭފުޅާވިދާޅުވިއެވެ. އަދި މިގޮތަށް ބޭސްވިއްކުމުގައި އެއްވެސް މައްސަލައެއް ނުޖެހި ހެލްތްސެންޓަރގެ މަސައްކަތްތަކަށް ވެސް އެއްވެސްކަހަލަ ބުރުލެއްނާރާ ގާތްގަޑަކަށް އަށެއްކަމަސް ދުވަހު މިކަންތައް ކުރެވިފައިމިވަނީ އޭރު ހެލްތްސެންޓަރ ހިންގަވަން ތިއްބެވި އިސްވެރިންގެވެސްއެހީއާއި އެއްބާރުލުން ލިބިގެންކަމުގައި ކަމަށްވެސް ބޭސްވިއްކުމުގައި އިސްކޮށްއުޅުއްވިފަރާތުން ލަންދޫއިންފޯއަށް ކިޔައިދެއްވިއެވެ.
އަދި އިތުރަށް މިކަމާއިބެހޭގޮތުން ލަންދޫއިންފޯއަށް މަޢުލޫމާތުދެއްވަމުން ބޭސްވިއްކެވިބޭފުޅާ ވިދާޅުވިއެވެ. ބޭސްވިއްކަމުން ދިޔައީ ސިއްރަކުންނޫނެވެ. ހުރިހާއެންމެންނަށް ވެސް އެނގިގެންނެވެ. ހެލްތްސެންޓަރގއި ބޭސްބެހެއްޓުމުގެ ހުއްދަވެސް ނަގައިގެންނެވެ. އެގޮތް ޤަބޫލްކޮށްގެން ބޭސްގަންނަން އަންނަމީހުންވެސްމަދެއްނޫނެވެ. ހަމަގައިމުވެސް ހެލްތްސެންޓަރގއި ވިއްކަންހުރި ބޭހެއްގަންނާކަށްއެކަކުވެސް ޖެހިގެންއޮތް މަނަދުއަކަށް ނުދެއެވެ.
އެބޭފުޅާވިދާޅުވިގޮތުގައި ތިމާމެންނޫނީ ބަޔަކުނެތޭ ހީވެގެންއުޅޭ ހައެއްކަ އަށެއްކަމީހުން އަބަދުވެސް ފެށުނީއްސުރެ މާފަރުގައި އުޅެމުންދެއެވެ.އެމީހުންގެ މަޤްޞަދަކަށްވެފައިވަނީ އެމީހުންނޫން އެހެންމީހަކު ނުވަތަ ބަޔަކު އާއެކޭ ބުނެފިއްޔާ އެމީހުން ނޫނެކޭބުނުމެވެ. އަދި ހަމައެހެންމެ ނޫނެކޭ ބުނެފިއްޔާ އާއެކޭ ބުނުމެވެ. މާނައަކީ ކޮންމެކަމަކަށްވެސް ދެކޮޅުހެދުމެވެ. އަދި އެބޭފުޅާ އިތުރަށް ވިދާޅުވީ މިކަންތައްވެސް ހުއްޓުވާލީ މިމީހުން މިފަދަރޫހެއްގައި އެއްރެއަކު އަޑުގަދަކޮށް ރަށުތެރޭގައި ހަޅޭފަޅޭ ލައްވާ ހެލްތްސެންޓަރތެރެއަށް ވަދެގަނެގެންނެވެ.
ލަންދޫއިންފޯއަށް މަޢުލޫމާތުދެއްވަމުން ބޭސްވިއްކުން ހުއްޓުވާލުމުގައި ހެލްތްސެންޓަރގެ މުވައްޒަފެއްގެ އެހީތެރިކަންވެސް އިދިކޮޅަށް އުޅުނުމީހުން ހޯދާފާ ވާކަމަށް އެބޭފުޅާ ތުހުމަތު ކުރެއްވިއެވެ. އެގޮތުން މާފަރުން ބޭސްވިއްކުމުގައި އިސްކޮށް އުޅުއްވި ބޭފުޅާ ވިދާޅުވީ ސަރުކާރުން ހެލްތްސެންޓަރަށް ފޮނުއްވާފައިވާ ހުއްދައިގެ މެސެޖްވެސް ވަނީ ވީނުވީއެއްނޭންގިގެއްލިފައެވެ. ނަމަވެސް ޖެހިގެންއައިދުވަހު މިހުއްދަ ވަނީފެނިފައެވެ.
އެބޭފުޅާ ވިދާޅުވި ގޮތުގާ އެބޭފުޅާގެ ބޭސްކޮޅު ނެރެފާ މިހާރުވެސް ހަމަ އެގޮތަށް މާފަރު ރކ.ކޮމިޓީގެ ނަމުގައި ހެލްތްސެންޓަރގައި ބޭސްއެބަވިއްކައެވެ. އޭރުމަނާކަމެއްކަމަށްވަނީ ވިއްޔާ މިހާރުވެސް އެކަންތައް މަނާވާނެނޫންހޭ ވިދާޅުވެ ސުވާލުކުރައްވައެވެ. ރކ.ކޮމިޓީއިން އެކޮމެޓީގެ އެއްވެސް ބައްދަލުވުމެއްގައި ރައްޔިތުންގެ ނަމުގައި އެގޮތަށް ބޭސްވިއްކަން ނިންމާފައި ނުވާނެކަމަށް މާފަރު ރކ.ކޮމިޓީގެ މެމްބަރަކު ލަންދޫއިންފޯއަށް ޔަޤީންކޮށްދެއްވިއެވެ. ނަމަވެސް މިހާރު ރކ.ކޮމިޓީ އިސްވެ އޮވެގެން މާފަރު ރައްޔިތުންގެ ނަމުގައި މާފަރު ހެލްތުސެންޓަރުގައި ޑިސްޕެންސަރީ ހަދައިގެން ބޭސްވިއްކަމުން އެބަދެއެވެ .ލަންދޫއިންފޯއިން އެދެނީ ކޮންމެ ބަޔަކު މިކަން ކުރިކަމުގައިވިޔަސް މާފަރު ރައްޔިތުންނަށް މެދުނުކެނޑި އަތްފޯރާ ފަށެއްގައި އަގުތައް ބަހައްޓައިގެން މިޚިދުމަތް ތަރައްޤީކޮށް އެއްދުވަހުން އަނެއްދުވަހަށް ޚިދުމަތުގައި ކުރިއަށް ދިޔުމެވެ.