އެމްޑީޕީ

އެމް،ޑީ،ޕީ ގެ ކެމްޕެއިން ޖަލްސާއެއް ރޭބާއްވައިފި

ލިޔުނީ : އަޙްމަދު ދާއޫދު

މަލްޓީޕާޓީ ވާދަކުރާގޮތަށް ފުރަތަމަފަހަރަށް ބޭއްވޭ ރާއްޖޭގެ ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވާ މުޙައްމަދު ނަޝީދު ( އަންނި ) އަށް ތާއީދު ހޯދުމުގެ ގޮތުން ނ.އަތޮޅުގައި ބާއްވާ ޖަލްސާތަކުގެ ތެރެއިން ލަންދޫގައި ރޭޖަލްސާ އެއްބާއްވައިފިއެވެ. އެމްޑީޕީގެ ފަރާތުން މިޖަލްސާ ލަންދޫގައި އިންތިޒާމްކުރީ އެމްޑީޕީގެ ލަންދޫ ( ގޮވެލި ) ގޮފީ ގެ މެމްބަރުންނެވެ.

ރޭ ގާތްގަޑަކަށް 9:00 ގައި ފެށުނު މިޖަލްސާ ފެށިގެންދިޔައީ ޤުރުއާންގެ ބަރަކާތުންނެވެ. ޖަލްސާ ތަޢާރަފްކުރުމުގެ ގޮތުން ވާހަކަދެއްކެވީ އެމްޑީޕީގެ ފަރާތުން ނ.އަތޮޅުގައި އެންމެއިސްކޮށް ކަންކަމުގައި ޙަރަކާތްތެރިވުމަށް ކަނޑައަޅާފައިވާ ނ.ކުޑަފަރި ފަހީމް އެވެ. ފަހީމްގެ ވާހަކައިގާ ޖަލްސާ ތަޢާރަފް ކުރުމުގެ އިތުރުން އަދުގެ ސަރުކާރު ގެ ދޯދިޔާ ކަމުގެ ވާހަކައާއި މިވަގުތު ރައީސުލްޖުމްހޫރިއްޔާގެ މަޤާމްގައި ހުންނެވި އަލްއުސްތާޛު މައުމޫނު ޢަބުދުލްޤައްޔޫމުގެ ސިޔާސަތުތަކާއި އެމްޑީޕީއިން ދެކޮޅުހަދާކަމާއި ، ދެކޮޅުހަދަންޖެހުނު ސަބަބުތައް ވަރަށްތަފްޞީލްކޮށް ހާމަކުރެއްވިއެވެ. އަދި އަމިއްލަގޮތުން މިނިވަން ކެނޑިޓޭޓެއްގެ ގޮތުގައި ރައީސްކަމަށް ކުރިމަތިލައްވާ ފައިވާ ޑރ.ޙަސަން ސަޢީދަށްވެސް ވަރަށް ބޮޑަށް އޭނައިގެ ވާހަކައިގާ ފާޑުކިޔުއްވިއެވެ. ޑރ.ޙަސަން ސަޢީދަކީ ވަރަށް ފަހަކާޖެހެންދެންވެސް އަދުގެ ސަރުކާރުގައި ބަންޑާރަނައިބެއްގެ ގޮތުގައި މަސައްކައްކަތްކުރައްވާ އަދި ސަރުކާރު ދިފާޢުކުރެއްވުމެގެ ބޭނުމުގައި އިސްލާޙީމަސައްކަތްތަކަށް ވަރަށް ބޮޑަށް ފާޅުގައިވެސް ހުރަސްއަޅުއްވާ ފައިވާ ބޭފުޅެއްކަމަށް ފަހީމުގެ ވާހަކައިގާ ތުހުމަތު ކުރެއްވިއެވެ.

ދެންމިޖަލްސާގައި އިތުރަށް ވާހަކަދެއްކެވީ ރައްޔިތުންގެ ޚާއްޞަމަޖްލީހުގެ މ.އަތޮޅުމެންބަރ ޝަފީޤެވެ. އޭނައިގެ ވާހަކައިގާވެސް އެމްޑީޕީ ފެށިގެން އައިގޮތް ތަފްޞީލްކޮށްދެއްވުމުގެ އިތުރުން އަދުގެ ސަރުކާރަށް ވަރަށް ބޮޑަށް ފާޑުކިޔުއްވިއެވެ. ދާދިފަހަކުން ޓޫރިޒަމް މިނިސްޓަރުކަން މަޢުމޫނު ޢަބުދުލް ޤައްޔޫމްގެ ކޮއްކޯފުޅު ޢަބުދުﷲ ޔާމީނަށް ދެއްވިކަމާއި އެކަމަކީ ވެސް ރައްޔިތުންނަށް ގޮންޖެއްސެވުމުގެ ގޮތުން އެމަނިކުފާނު ކުރެއްވިކަމެއްކަމަށް ހާމަކުރެއްވިއެވެ. އަދި އެކަމުގެ ސަބަބުން ހާމަވެގެންދަނީ ރައީސުލްޖުމްހޫރިއްޔާ ކަމަށް އާދައުރަކަށް އަލްއުސްތާޛް މައުމޫން ޢަބުދުލް ޤައްޔޫމް ރައްޔިތުން ހޮވިނަމަވެސް އެމަނިކުފާނުގެ ސިޔާސަތަށް އެއްވެސް ހެޔޮ ބަދަލެއް ނާންނާނެކަން ކަމަށްވެސް ޝަފީޤު މިޖަލްސާގައި ވާހަކަދައްކަމުން ބުނުއްވިއެވެ.

އެމްޑީޕީ އުފެދިގެން އައިއިރު ރާއްޖެތެރޭގެ ރަށެއްގައި އެންމެފުރަތަމަ އެމްޑީޕީގެ ގޮތްޕެއް ހެދީ ލަންދޫގައިކަން މިފުރުޞަތުގައި ފާހަގަކުރަމެވެ. އަދި އެދުވަސް ވަރު މުޅިރަށް ކަހަލަގޮތަކަށް އެމްޑީޕީއަށް ސަޕޯޓްކުރިކަމުގައިވިޔަސް މިދުވަސްވަރު ލަންދޫގެ ސަޕޯޓް އެހެންދިމަދިމާއަށްވެސް މަޑުމަޑުންނަމަވެސް އެބަދާކަން ޤަބޫލުކުރަންޖެހެއެވެ. އެގޮތުން އެމްޑީޕީއިން ބޭއްވި މިޖަލްސާގައި ބައިވެރިލަންދޫގެ ރައްޔިތުންގެ ޢަދަދު އެކަށީގެންވާ ވަރަށް ވުރެމާމަދުކަން ފާހަގަކުރަމެވެ.

މިދުވަސްވަރު ރިޔާސީ އެހެނިހެން ކެނޑިޑޭޓުން ދައްކަވަމުން ، ހާމަކުރައްވަމުންގެންދަވާ މެނިފެސްޓޯ ތަކުގެސަބުން ނަމަވެސް ޑރ. ޙަސަން ސައީދަށް ސަޕޯޓްކުރައްވާ ރައްޔިތުންވެސް ފުދޭވަރަކަށް މިހާރު ލަންދޫގައި ގިނަކަމުގައި ދެންނެވުމަކީ ދޮގަކަށްނުވާނެއެވެ.

އަހަރެންގެ ވިސްނުން! 18

ލިޔެސް އަށް ޓީޓީ ކުޅޭ ސާމާނާއި ވޮލީ ކުޅޭ ސާމާނު ލިބިއްޖެ.

ޙަފްޞީ ޢަބުދުﷲ

ލަންދޫގައި ތަފާތު ކުޅިވަރުތައް ކުރިއެރުވުމަށް ކުރަމުންދާ މަސައްކަތުގެ ދަށުން، ޓޭބަލް ޓެނިސް ކުޅޭ ސާމާނާއި ވޮލީބޯޅަ ކުޅޭނެ ސާމާނު މިއަދު ލިބިއްޖެއެވެ. ޓޭބަލް ޓެނިސް އެސޯސިއޭޝަނާއި ގުޅައިގެން ކުރި މަސައްކަތުން ލިބިފައިވަނީ ތިރީސް ބޯޅަ އާއި، ހަތަރު ރެކެޓެވެ. ޖަމްއިއްޔާގައި ޓޭބަލް ޓެނިސް މޭޒެއް ހުރުމާއެކު، އާފެށުމަކުން މިކުޅިވަރު ތަރައްޤީކުރަން ފެށޭނެކަމަށް އަޅުގަނޑު ދެކެމެވެ. މިތަކެތި ކުރިއަށްއޮތް އީދު ދުވަހަށް ވާއިރު ލަންދޫގެ ޒުވާނުން ބޭނުންކުރަން ލިބޭނެކަމަށް އަޅުގަނޑު ޔަޤީންކުރަމެވެ. ހަމައެހެންމެ ރޭވުންތެރިކަމާއެކު، ލަންދޫގެ ޒުވާނުންނަށް މިކުޅިވަރުކުޅެވޭނެ އިންތިޒާމް އަނެއްކާވެސް ހަމަޖެހިގެންދާނެކަމަށް އަޅުގަނޑު ޤަަބޫލުކުރަމެވެ.

މިނިސްޓްރީ އޮފް ޔޫތް އެންޑް ސްޕޯރޓްސްއަށް ދަންނަވައިގެން ކުރި މަސައްކަތުން ވޮލީބޯޅަ ކުޅޭނެ ސާމާނު ލިބޭނެކަމުގެ ޔަޤީންކަން މިއަދު ވަނީ ދެއްވާފައެވެ. ނަމަވެސް އެމިނިސްޓްރީގައި އަޅުގަނޑުމެންވާނީ ބެޑްމިންޓަންއާއި ބާސްކެޓް ކުޅޭނެ ސާމާނަށްވެސް އެދިފައެވެ. އެތަކެތި ލިބުނުކަން އަދި އަންގާފައެއްނުވެއެވެ. ކުރިއަށްއޮތީ ފޯރިގަދަ ވޮލީބޯޅަ މުބާރާތެއްކަމުން މިލިބުނު ތަކެއްޗާއެކު އިތުރު ކުރިއެރުމެއް ލިބޭނެކަމަށް އަޅުގަނޑު ދެކެމެވެ. ވޮލީބޯޅަ ކުޅޭ ސާމާނު ލިބުނީ ކިހާވަރަކަށް ކަން އަދި ޔަޤީނެއް ނުވެއެވެ. އެތަކެތި މިހަފްތާގައި ލިބޭނެކަމަށް އުއްމީދުކުރެވެއެވެ.

އަދިވެސް އިތުރު ކުޅިވަރުތަކަށް ބޭނުންވާ ތަކެތި ހޯދުމަށް މެދުނުކެނޑި މަސައްކަތްކުރަމުންދާވާހަކަ ލަންދޫ ޔޫތް އެންކަރޭޖިންގ ސޮސައިޓީގެ މެމްބަރުންނާ ޙިއްޞާކޮށްލަމެވެ. އަދި މިތަކެތީގެ ބޭނުން ރޭވުންތެރިކަމާއެކު ހިފާނެކަމަށް އަޅުގަނޑު ޔަޤީންކުރަމެވެ.

ޤުރުއާން

ރަމަޟާން ޤުރުއާން މުބާރާތް 1429 ބާއްވައިފި

ލިޔުނީ : އަޙްމަދު ދާއޫދު

ލަންދޫސްކޫލްގެ ދަރިވަރުންގެ ހިތްތަކުގައި ޤުރުއާނަށް ލޯބިއިތުރުކޮށް ފަރިތަކޮށް ތަޖްވީދުގެ ހަމަތަކުން ޤުރުއާން ކިޔަވަން ކުދިންނަށް ދަސްކޮށްދީ ޤުރުއާނަށް އަހްލުވެރި ކުރުވުމުގެ މަޤްޞަދުގައި ކޮންމެއަހަރަކުވެސް ރަމަޟާން މަހު ބާއްވަމުން އަންނަ ޤުރުއާން މުބާރާތް އިއްޔެ ނިމިއްޖެއެވެ. ބަލައިގެން ކިޔެވުމާއި ، ހިތުދަސްކޮށްގެން ކިޔެވުމުގެ ބައިހިމެނޭގޮތުން ދެގޮތްޕަކަށް ބަހާލައިގެން ބޭއްވުނު ރަމަޟާން ޤުރުއާން މުބާރާތް 1429 ގައި ކޮންމެ ބަޔަކުންވެސް 5 ޢުމުރުފުރާއަކުން ދަރިވަރުން ބައިވެރިވެފައިވެއެވެ. އެގޮތުން ނުބަލާކިޔުމުގެ ބައިގާ 49 ދަރިވަރުންނާއި ބަލައިގެން ކިޔެވުމުގެ ބައިގާ 49 ދަރިވަރުން އެކި ޢުމުރުފުރާތަކުން ބައިވެރިވެފާ ވެއެވެ.

ދެދުވަހުގެ މުއްދަތަށް ދިގުދެމިގެން ދިޔަ މިމުބާރާތުގައި ޖަޖުންގެ ގޮތުގައި ތިއްބެވީ މުދިމް ޙުސެއިން އާދަމާއި ، މުދިމް ޢަބުދުއްރަޙީމް ޢަބުދުއްރަޙްމާނާއި ، ޕްރައިމަރީޓީޗަރ މުޙައްމަދު އިބްރާހީމާއި އަދި ޕްރައިމަރީ ޓީޗަރ ޙައްވާ ޝާއިރާއެވެ.

ވޭތުވެދިޔަ އަހަރުތަކާއި ޚިލާފަށް މިއަހަރު މިމުބާރާތަށް ބެލެނިވެރިން ދެއްވި ތަރުޙީބު ކުޑަކަމަށް ލަންދޫސްކޫލުން ހާމަކުރައްވައެވެ. އަދި ވޭތުވެ ދިޔައަހަރުތަކުގައި ޤުރުއާން މުބާރާތަށް ދަރިވަރުން ތައްޔާރުވެފައިވާ މިންވަރަށް ވުރެ މިއަހަރުގެ މުބާރާތަށް ދަރިވަރުން ތައްޔާރުވެފައިވާ މިންވަރު ކުޑަކަން ދަރިވަރުންގެ ކިޔެވުމުގެ ފެންވަރަށް ބަލާއިރު ވަރަށް ރަގަޅަށް ޘާބިތުވާކަމަށް ލަންދޫސްކޫލުން ހާމަކުރައްވައެވެ.

އެސްކޫލުން މަޢުލޫމާތު ދެއްވިގޮތުގައި ކުޑަޢީދު ބަންދަށްފަހު ސްކޫލުހުޅުވުމުން ، މި މުބާރާތުގެ ނަތީޖާ ފާޅުކުރާނެ ތާރީޚެއް ރަސްމީކޮށް އެސްކޫލުން އިޢުލާން ކުރައްވާނެއެވެ.

ޤާސިމް

ޖުމްހޫރީޕާޓީގެ ރިޔާސީ ކެނޑިޑޭޓް ޤާސިމް އިބްރާހީމް ލަންދުއަށް ވަޑައިގަންނަވަނީީީ

ލިޔުނީ : އަޙްމަދު ދާއޫދު

ޖުމްހޫރީ ޕާޓީގެ ރިޔާސީ ކެނޑިޑޭޓް ދީލަތި ވިޔަފާރިވެރިޔާ އަލްފާޟިލް ޤާސިމް އިބްރާޙިމް އެމަނިކުފާނުގެ ކެމްޕޭން ދަތުރުފުޅުގައި ނ.އަތޮޅުގެ ގިނަރައްތަކަކަށް ކުރައްވާ ޒިޔާރަތުގެ ދަށުން މާދަމާ ލަންދުއަށް ވަޑައިގަތުމަށް ހަމަޖެހިފައިވާ ވާކަމަށް ލަންދޫއިންފޯއަށް މަޢުލޫމާތުލިބިއްޖެއެވެ. ލަންދޫގައި ޤާސިމަށް ތާއީދުކުރައްވާ ބޭފުޅުންގެ ތެރެއިން އިސްބޭފުޅަކު ލަންދޫއިންފޯއަށް ކަށަވަރުކޮށްދެއްވިގޮތުގައި މާދަމާ 10 އާއި 11 އާއި ދޭތެރޭގެ ވަގުތެއްގައި ގާސިމް ލަންދޫއަށް ވަޑައިގަންނަވާނެއެވެ.

ޤާސިމަށް ތާއީދުކުރާމީހުން ލަންދޫގައި އެބަތިބިބާއޭ މިއީ ވަރަށްގިނަބައެއްގެ ހިތުގައި އުފެދޭނެ ސުވާލެއްކަން ޔަޤީނެވެ. ޖަވާބުގައި ދަންނަވަންޖެހެނީ އާއެކެވެ. ޤާސިމްގެ އެހީގައި ބޭސްފަރުވާ ކޮށްފައިވާ ވަރަށްގިނަޢަދަދެއްގެ މީހުން ލަންދޫގައިވެސް އެބަތިއްބެވެ. އެހުރިހާމީހުންވެސް ބުނަނީ ތިމަންނާމެންނަށް ދުވަހަކުކޮޅުންވެސް އެއްޗެއްދިނީ ޤާސިމް ކަމަށެވެ. އެހެންކަމުން ތާއީދުކުރެވޭނީވެސް އޭނާއަށެވެ.

ރަށުތެރޭގައި ހަރުކުރެވިފައިވާ ޕޯސްޓަރުތަކަށް ބަލާލާއިރު އަންނިގެ ޕޯސްޓަރުތައްވެސް މަދެއްނޫނެވެ. ޤާސިމްގެ ޕޯސްޓަރުތަކާއި އަންނީގެ ޕޯސްޓަރތައް ފިޔަވާ އެހެން ޕާޓީއެއްގެ ޕޯސްޓަރެއް އަދި ލަންދޫއަކުން ނުފެނެއެވެ. އެހެންޕާޓީތަކުން ފަހަރެއްގައި ތަންކޮޅެއް ވޯޓްލާދުވަހާއި ގާތްކޮށްފާ ޕޯސްޓަރުތައް ހިއްޕަން މަޑުކޮށްލައިގެންތިބީކަމުގއިވެސް ވެދާނެއެވެ.

ލަންދޫއިންފޯގެ ފަރާތުން އަޅުގަނޑުމެން ދަންނަވާލަންބޭނުންވަނީ " ވޯޓުލާންނިންމާށޭ އަދި ވޯޓުން ނިންމާށޭ " އެވެ.

ޚަބަރު

އެމް ، ޑީ، ޕީ އިން ކުރިސަރވޭގެ ނަތީޖާ

ލިޔުނީ : މޫސާ ޙުސެއިން / މިހާސް

email: moosa.goma@yahoo.com

ފުރަތަމަ ފަހަރަށް މަލްޓިޕާޓީ އިންތިޚާބަށް ލަންދޫގެ ރައްޔިތުންވެސް އަންނަނީ ތައްޔާރުވަމުންނެވެ. މިގޮތުން އެންމެ ބޮޑަށް ފާހަގަވެގެންދަނީ މިރިޔަސީ އިންތިޚާބުގައި ވާދަކުރައްވާނެކަމަށް އިޢުލާންކުރައްވާފައިވާ ގިނަކެނޑިޑޭޓުންތަކެއް މިރަށަށް ވަޑައިގެން އެބޭފުޅުންގެ ވެރިކަމެއްގައި ގެންގުޅުއްވާނެ ސިޔާސަތު ހާމަކުރައްވާފައިވާ ކަމެވެ. މިގޮތުން މިރަށަށް ވަޑައިގެންނެވި ކެނޑިޑޭޓުންތަކުގެ ތެރޭގައި އައިޑީޕީގެ ރިޔާސީ ކެނޑިޑޭޓު ޢުމަރުނަޞީރު، އެމްޑީޕީގެ ރިޔާސީ ކެނޑިޑޭޓް މުޙައްމަދު ނަޝީދު ( އަންނި ) ، އަދި އަމިއްލަގޮތުން ކުރިމަތިލައްވައިގެންއުޅުއްވާ ރިޔާސީ ކެނޑިޑޭޓް ޙަސަން ސަޢީދު ހިމެނިލައްވައެވެ.ދެންމިރޭހުގައި ވާދަކުރައްވާނެކަމަށް އިޢިލާންކުރައްވާފައިވާ 4 ބޭފުޅުންގެ ތެރެއިން އިދުހަމް މުއިއްޒު އަދުނާން އާއި އިބްރާ ފިޔަވާ އެހެންހުރިހާ ބޭފުޅުންގެ ފަރާތުން ތަފާތުފެންވަރުގެ ވަފުދުތައް ރަށަށް ޒިޔާރަތްކުރައްވާ އެބޭފުޅުންގެ ސިޔަސަތުތައްވަނީ ހާމަކުރައްވާފައެވެ.

މިކަންތައްކާއި ގުޅިގެން ރައްޔިތުންގެ މެދުގައި މިއިންތިޚާބާއިމެދު ހޭލުންތެރިކަންވަނީ ކޮންމެވެސް ވަރަކަށް އުފެދެންފަށާފައި ކަމަށް ދަންނަވަން ޖެހެއެވެ. މިއިންތިޚާބާއި ގުޅޭގޮތުން މިރަށުގައި އަދި މިހާތަނަށް ކުރެވިފައިވަނީ ހަމައެންމެ ސަރވޭއެކެވެ.

އެމްޑީޕީ އިން އިސްނަގައިގެން ކުރެވުނު މިސަރވޭ ކުރުމުގައި ބައިވެރިވެލެއްވީ ނ.ލަންދޫ ބުލޫހެވަން އަލްފާޟިލް މުފީދު ޙުސެއިންއާއި، ލަވްސައިޑް އަލްފާޟިލް ޙަސަން ޢަބުދުލްހަކީމާއި، އަކިރި އަލްފާޟިލް ވަލީދު އާދަމާއި، ފޭރުގަސްދޮށުގޭ އަލްފާޟިލް ޢައްބާސް ޢަބުދުﷲ އެވެ.

ޢައްބާސް ޢަބުދުﷲ ލަންދޫ އިންފޯއަށް މަޢުލޫމާތު ދެއްވިގޮތުގައި ރަށުގެ ހުރިހާ ގެއަކަށް ގޮސްގެން ކުރެވުނު މިސަރވޭގެ ނަތީޖާދައްކާގޮތުން ގާތްގަޑަކަށް މިރަށުގެ %85 މީހުން ވޯޓްލާނީ އެމްޑީޕިގެ ރިޔާސީ ކެނޑިޑޭޓް މުޙައްމަދު ނަޝީދު ( އަންނި ) އަށް ކަމުގައި ބުނެފައިވާކަމަށެވެ. %10 މީހުން ވޯޓްލާނެ ވަކިމީހެއް ކަނަޑައެޅިގެން ނުނިންމާއިރު %5 މީހުން ޑީއާރުޕީގެ ރިޔާސީ ކެނޑިޑޭޓް އަލްއުސްތާޛް މަޢުމޫން ޢަބުދުލްޤައްޔޫމަށް ވޯޓްދޭނެކަމަށް ބުނެފައިވާ ކަމަށެވެ.

މިއީ ގާތްގަޑަކަށް މީގެ 2 ހަފްތާއެއްހާ ދުވަސްކުރިން އެބޭފުޅުން ހައްދަވާފައިވާ ސަރވޭއެއްގެ ނަތީޖާއެވ.ެ

އިރާދަކުރެއްވިއްޔާ އަޅުގަނޑުމެން ލަންދޫއިންފޯޓީމްގެ ފަރާތުން މިފަދަ އެހެން ސަރވޭއެއް ވަރަށް އަވަހަށް ކިޔުންތެރިންނާ ހިސާބަށް ގެނެސްދެވޭތޯ މަސައްކަތްކުރަމުންގެންދާ ވާހަކަ ކިޔުންތެރިންގެ މަޢުލާމާތަށްޓަކައި ދަންނަވާލަމެވެ.

ޚަބަރު

އިކޮނޮމިކްސް ޓީޗަރަށްެ ބެލެނިވެރިޔަކުުބިރުދައްކައިފި

ލިޔުނީ : އަޙްމަދު ދާއޫދު

މާފަރުސްކޫލްގައި އިކޮނޮމިކްސް ކިޔަވައިދެއްވުމަށް މިނިސްޓްރީއޮފް އެޑިޔުކޭޝަނުން ފޮނުއްވާފައި ހުރި އިންޑިޔާގެ ރައްޔިތެއް ކަމުގައިވާ މރ.ސްނިލްކްމާރު ރަމަޗަންދުރަންއަށް އެސްކޫލްގެ ފިރިހެން ބެލެނިވެރިޔަކު ބިރުދައްކާ ވަގުތުން ރަށުންފުރުމަށް އަންގައިފިއެވެ.

މިމަޢުލޫމާތު ލަންދޫއިންފޯއަށް ލިބުމާއި ގުޅިގެން މީގެ އިތުރުތަފްޞީލް ހޯދުމަށް މާފަރުސްކޫލްގެ ސްޕައިވަޒަރާއި ފޯނުންގުޅާލުމުން އެބޭފުޅާވެސް މިކަންކަށަވަރުކޮށްދެވަމުން މިއީ އެސްކޫލްގެ ގްރޭޑް 10 ގެ އަންހެން ދަރިވަރަކާއި މިޓީޗަރާދެމެދު ލޯބީގެ ގުޅުމެއް އޮންނަކަމަށް ތުހުމަތު ކޮށްފާ ހިނގިކަމެއްކަމަށް ވިދާޅުވިއެވެ. މިބެލެނިވެރިޔާ ޓީޗަރަށް ވަގުތުން ފުރަންއެންގީ އަންހެންކުއްޖާގެ ބެލެނިވެރިޔާ ދެކެ އައި ރުޅިއެއްގެ ސަބަބުން ކަމަށް ފަހުންމިބެލެނިވެރިޔާ ސްކޫލްގައި ބުނެފައިވެއެވެ.

ޓީޗަރުމީހާއަށް ވަގުތުންރަށުން ނުފުރައިފިކަމަށްވަނީ ވިއްޔާ މަރާލާނެކަމުގެ އިންޒާރުވެސް ދިންކަމަށް ޓީޗަރުމީހާ މާފަރުސްކޫލްގައި ޝަކުވާކޮށްފާވެއެވެ. އަދި ވަގުތުންވަގުތަށް އެހެންރަށަކަށްނަމަވެސް ދާން ބޭނުންވެގެން ސްކޫލްގައި އެދުމުން ސްކޫލުންވެސް ވަނީ މީނާއަވަސްވީގޮތަކުން ރަށުންފޮނުވާލުމަށްޓަކައި މިނިސްޓްރީގެ ކަމާބެހޭފަރާތްތަކުން ހުއްދަވެސްނަގާ އެރެފުރާ މާފަރުބޯޓުން މާލެފޮނުވާލުމުގެ ހުރިހާ އިންތިޒާމެއް ސްކޫލްގެފަރާތުން ވަގުތުންވަގުތަށް ކުރަންޖެހުނު ކަމުގައި މާފަރުސްކޫލުން މަޢުލޫމާތުދެއްވިއެވެ.

މިހުރިހާ އިންތިޒާމެއް ކޮށް މިޓީޗަރ ފުރުވާލުމުގެ ހުރިހާކަމެއްނިމިފައިވަނިކޮށް އިންޒާރުދިންބެލެނިވެރިޔާފަހުން ސްކޫލަށްއައިސް މިއީ އޭނާއެވަގުތު އަންހެންކުއްޖާގެ މަންމަ ދެކެއައި ރުޅިއެއްގެސަބަބުން ކުރެވުނުކަމެއްކަމަށް ސްކޫލްގައި އިއުތިރާޒްވެ މިކަންއަނބުރާ ގެނެސް ޓީޗަރ މީހާ ރަށުން ފޮނުވައިނުލާ ރަށުގައި ބެހެއްޓިޔަސް އެންމެރަގަޅުކަމުގައި ބުނިކަމަށް މާފަރުސްކޫލުން މާފަރުސްކޫލްގެ ސްޕަވައިޒަރ ލަންދޫއިންފޯއަށް މަޢުލޫމާތުދެއްވިއެވެ. އަދި މިބެލެނިވެރިޔާ އަމާންދިނުމުން ޓީޗަރ މީހާވެސް ފޮނުވައިނުލާ ގޮތަށް މިހާރުހަމަޖައްސާފައި ވާކަމަށްވެސް ލަންދޫއިންފޯއަށް އެނގިފައިވެއެވެ.

މިފަދަކަންކަމަކީ މާފަރުގައި ނޫނަސް މަދުމަދުންނަމަވެސް އެހެންރަށްރަށުގައިވެސް ހިނގާކަންތައްތަކެއްކަން ވަނީ ޤަބޫލުކުރަންޖެހިފައެވެ. ނަމަވެސް މިގޮތަށްހަރުކަށި އިންޒާރުތައް ދީގެން ޓީޗަރުން ރަށުންބޭރުކުރުމުން ނުވަތަ ފޮނުވާލުމުން ހުރިހާގެއްލުމެއްވެސް ލިބޭނީ ކިޔަވަދަރިވަރުންނަށްކަން މިފަދަ އިންޒާރުދޭ ފަރާތްތަކުން ވިސްނާލަންޖެހޭނެއެވެ. އަދި ހަމައެއާއިއެކު މިފަދަ ގޮތަކަށް އެންމެމީހަކު ދޭއިންޒާރަކަށް ނުވަތަ ބުނެލާ އެންމެބަހަކަށް ސްކޫލްފަދަ ރައްޔިތުންނާއި ބޮޑަށްގުޅުންހުރި މުއައްސަސާއަކުން ޢަމަލުކުރުމަކީ މާހަމަޖެހޭކަމެއްކަމަށް ލަންދޫއިންފޯއަކުން ނުދެކެމެވެ. އަދި ލަންދޫއިންފޯއިން އިލްތިމާސް މިކުރަނީ މިފަދަހަރުކަށި ފަރާތްތަކުން ޙާޞިލްކުރަން އެބޭނުންވާ އަމިއްލަ މަޤްޞަދަށް ފުރުޞަތު ނުދިނުމަށެވެ.

ޚަބަރު

ލަންދޫ މަސްޖިލްބަރަކާތުގެ މުދިމް ބަދަލުކުރައްވައިފި

ސ

ލިޔުނީ : އަޙްމަދު ދާއޫދު

ސ

ލަންދޫ މަސްޖިދުލް ބަރަކާތުގެ މުދިމް ކަމަށް ލަންދޫ ވިނަރެސް އަލްފާޟިލް އަބުދުއްރަޙީމް ޢަބުދުއްރަހްމާން ހަމަޖައްސަވައިފިކަމުގައި ލަންދޫ އޮފީހުން ލަންދޫ އިންފޯއަށް މަޢުލޫމާތު ދެއްވައިފިއެވެ. މިމަހުގެ 11 ވަނަދުވަހުން ފެށިގެން އަލްފާޟިލް ޢަބުދުއްރަޙީމް ޢަބުދުއްރަހްމާނު އެވަޒީފާއަށް ހަމަޖެހިފައިވީ ކަމުގައިވިޔަސް އޭނާއަށް ރަސްމީކޮށް ވަޒީފާ ހަމަޖެހުނުކަން ލަންދޫއޮފީހުން އެންގެވީ މިއަދުއެވެ.

އަލްފާޟިލް ޢަބުދުއްރަހީމް އަބުދުއްރަޙްމާނާއި އެކު މިވަޒީފާއަށް 3 ފަރާތަކުން ކުރިމަތިލެއްވިއެވެ. އަނެއް ދެފަރާތަކީ ލަންދޫ މޫރިތި އަލްފާޟިލް އަޙްމަދު ޝާމިލް އާއި ، ލަންދޫ ބަހާރުގޭ އަލްފާޟިލް މުޙައްމަދު މޫސާއެވެ. މިތިންބޭފުޅުންނަކީ ވެސް މުދިމް ކަމުގެ ކޯސް ނުހައްދަވާ ތިއްބެވި ތިންބޭފުޅުން ކަމަށްވާއިރު އަދި މީގެ ތެރެއިން އަޙްމަދު ޝާމިލް އަކީ ގްރޭޑް 10 ނިންމާ އެސްއެސްސީ އިމްތިހާންގައި ދިވެހި އިސްލާމުން ފާސްވެފައިވާ ޢުމުރުން ވަރަށް ޅަބޭފުޅަކަށްވާއިރު މިވަޒީފާއަށް ހަމަޖެހުނު އަލްފާޟިލް ޢަބުދުއްރަޙީމް ޢަބުދުއްރަޙްމާނަކީ މިވަޒީފާއަށް ކުރިމަތިލީ ބޭފުޅުންގެ ތެރެއިން އެންމެއެކަށީގެންވާ ބޭފުޅާ ބާއޭ ސުވާލުއުފެދެއެވެ. އަދި މިއީ ރަށުތެރޭގައި ދޭދޭ ދެމީހުންގެ މެދުގަޔާއި ހޮޅުއަށިތަކުގައި ެ ފުޅާދާއިރާއެއްގައި ފުދޭ ވަރަކަށް ބަހްޡް ކުރެވެމުންދާ މައްސަލައެކެވެ.
މިވަޒީފާއަށް އަލްފާޟިލް ޢަބުދުއްރަޙީމް ޢަބުދުއްރަޙްމާން މިހަމަޖެއްސެވީ ކޮންހައިސިއްޔަތަކުން ބައްލަވާފަތޯ ކުރެވުނު ސުވާލަކަށް ޖަވާބުދެއްވަމުން ލަންދޫ ކުޑަކަތީބު އަލްފާޟިލް ޢަބުދުއްނާޞިރު ޢަލީ ވިދާޅުވީ ވަޒީފާ ތައް ހަމަޖައްސަވަނީ އެބޭފުޅުން ނޫންކަމާއި އެބޭފުޅުން ހަމައެކަނި ކުރެއްވި ކަމަކީ ކުރިމަތިލެއްވި ތިންބޭފުޅުންގެ ޤުރުއާން ކިޔެވުން ރެކޯޑުކޮށްފާ މަތީ މަޖްލީހަށް ފޮނުއްވެވީ އެވެ. އަދި މަތީމަޖްލީހުން ތިންބޭފުޅުންގެ ޤުރުއާން ކިޔެވުން ބައްލަވާފާ އެވަޒީފާ އަލްފާޟިލް ޢަބުދުއްރަޙީމް ޢަބުދުއްރަޙްމާނަށް ހަމަޖެއްސެވީ ކަމުގައި ވެދާނެކަމަށް ކުޑަކަތީބު އިތުރަށް ވިދާޅުވިއެވެ.
ޢުމުރުން 50 އަހަރާ ގާތްކޮށްފައިވާ އަލްފާޟިލް ޢަބުދުއްރަހީމް ޢަބުދުއްރަޙްމާނަށް މިވަޒީފާ ސިވިލްސަރވިސް ކޮމިޝަނުން މިހަޖެއްސެވީ ވަޒީފާއަށް ކުރިމަތިލީބޭފުޅުންގެ ތެރެއިން އެކަމަށް އެންމެއަކަށީގެންވާ ބޭފުޅާކަމަށް އެބޭފުޅާވާތީ ކަމާމެދަކު ލަންދޫއިންފޯއަކުން ޝައްކެއްނުކުރަމެވެ. ސަބަބަކީ އަލްފާޟިލް ޢަބުދުއްރަޙީމް ޢަބުދުއްރަޙްމާނަކީ އެބޭފުޅާގެ ޢުމުރުގެ ވަރަށް ޅައިރުއްސުރެވެސް ދީނީކަންކަމަށް ލޯބިކުރައްވާ ބަރާބަރަށް ނަމާދުކުރައްވާ ޤުރުއާން ކިޔަވާ އަދި މަޢުލޫދު ކިޔުން ، ދުޢާބުނުން ، ޛިކުރު ކިޔުން ފަދަ ކަންކަމުގައި ރަށުގައި އުޅުއްވި ބޭފުޅުންގެ ތެރެއިން ނަން މަޝްހޫރުބޭފުޅެކެވެ.
އަލްފާޟިލް ޢަބުދުއްރަޙީމް ޢަބުދުއްރަޙްމާނަކީ ސިމެންތީގެ ހުރިހާމަސައްކަތެއް ވަރަށް ރަގަޅުފެންވަރެއްގައި ކުރައްވަން ދެނެލައްވާ އަދި ދިރިއުޅުއްވުމުގައި އާމްދަނީ ހޯދުމަށް މަސައްކަތެއްގެ ގޮތުން މިހާރުވެސް އެމަސައްކަތްތައް ކުރައްވަމުން ގެންދަވާ ބޭފުޅެކެވެ.
ތުނބުޅިދިގުކޮށްފާ ބެހެއްޓުމަކީ ރަސޫލާގެ ސުންނަތެއްކަމަށްވާތީ ހުރިހާ މުސްލިމުފިރިހެނުންވެސް ތުބުޅިދިގުކުރަންޖެހޭނެކަމަށް ވަރަށް ގަދައަށް ބުނުއްވާ ދާދިފަހަކުން ، ތުނބުޅިދިގުކުރެއްވުމަށް ފަހު މިހާރު އަނެއްކާ ވަރަށް ތުނިތުނިކޮށް ތުނބުޅިކޮއްޓަވާލައްވައިގެން އުޅުއްވާ އަލްފާޟިލް ޢަބުދުއްރަހީމަކީ ރަށުގެ ވަރަށް ގިނަބައެއްގެ ތާއީދާއި ލޯބި ޙާސިލް ކުރައްވާ ފައިވާ ބޭފުޅެކެވެ. މިހާތަނާ ޖެހެންދެން ލަންދޫމަސްޖިދުލް ބަރަކާތުގެ މުދިމްކަމުގައި ހުންނެވީ ލަންދޫ ވީވަރު އަލްފާޟިލް ޚާލިދު ޢަބުދުލް ޙަކީމެވެ. ސިވިލްސަރވިސް ގެ ފަހުގެ ޤަވާއިދުގެދަށުން ޢުމުރުން 65 އަހަރު ވެގެން ޚާލިދު ޢަބުދުލް ޙަކީމް ވަޒީފާއިން ވަކިކުރެއްވީކަމުގައި ލަންދޫ އިންފޯއަށް މަޢުލޫމާތު ލިބިފައިވެއެވެ.

ޚަބަރު

އިންޖިނުގެވަޒީފާއަށް ދެވަނަފަހަރަށް އިޢުލާން ކުރައްވައިފި

ސ

ލިޔުނީ : އަހްމަދު ދާއޫދު

ސ

ލަންދޫރައްޔިތުންގެ އިންޖީނުގޭގައި ޑިއުޓީ އަދާކުރަމުން ގެންދާ 3 މުއައްޒަފުންގެ ތެރެއިން ފައިސަލް ޢަބުދުއްޞަމަދު އިންޖީނުގޭގެ ވަޒީފައިން ވަކިވުމާއި ގުޅިގެން އެވަޒީފާއަށް މީހަކުހޯދުމަށް ކުރެއްވި އިޢުލާނުގެ މުއްދަތު ހަމަވި އިރު އެންމެފަރާތަކުން ކުރިމަތިލައިފާ ވާތީ އެ އިޢުލާން އަނެއްކާ ދެވަނަފަހަރަށް ކުރައްވައިފިއެވެ.
މިފަހަރުގެ ޢިއުލާނުގެ މުއްދަތުވެސް މިއަންނަ ބުރާސްފަތި ދުވަހުގެ 13:30 ށް ހަމަވާނެއެވެ. ނަމަވެސް އަދި ވެސް އިތުރުފަރާތަކުން ކުރިމަތިލީކަމެއް އެނގިފައެއްނުވެއެވެ. ކުރިން ކުރެއްވި އިޢުލާނާއި ގުޅިގެން ކުރިމަތި ލެއްވީ ލަންދޫ އޯކިޑުމާގެ ޝަރުމީލާ ޔޫސުފުގެ ފިރިމީހާ މުޙައްމަދު ފައިސަލްއެވެ.
ލަންދޫއިންޖީނުގޭގެ މުވައްޒަފުންނަކީ ވަރަށް އަވަސްއަވަހަށް ބަދަލުވަމުންދާ ބައެއްކަމަށް އެންމެންވެސް އިއްތިފާޤުވާނެއެވެ. ވަޒީފާ ތަކަށް ކުރިމަތިލާ ފަރާތްތަކުން ވަޒިފާއާއި ޙަވާލުވާއިރު ވަރަށްފޯރިއާ ޢަޒުމާ އެކު ދިގުމުއްދަތަކަށް އެމަސައްކަތުގައި ދެމިހުންނާނެ ކަމަށް ބުނެ ވަޒިފާއާއި ހަވާލުވުމަށް ފަހު އިންޖީނުގޭގެ ވަޒިފާއިން އަވަސްއަވަހަށް މިވަކިވަނީ ކީއްވެގެން ކަމާއި މެދު ސުވާލުއެފެދެއެވެ.
މުސާރައިގެ މައްސަލައަކަށްވެސް ވެދާނެއެވެ. ނުވަތަ ޒިންމާ އާއި މަސްއޫލިއްޔަތު އަދާކުރުމުގައި އިހްމާލުވެވެނީ ކަމަށްވެސް ވެދާނެއެވެ. ނުވަތަ ކޮންމެވެސް އެހެންމައްސަލައަކަށްވެސް ވެދާނެއެވެ. ކޮނެއަކަސް އެނގޭކަމަކީ ލަންދޫއިންޖީނުގެގޭ މުވައްޒަފުން ވަރަށް އަވަސްއަވަހަށް ބަދަލުވާކަމެވެ.
މިފަހަރު ވަޒިފާއިން މިވަކިވި ފައިސަލް ޢަބުދުއްޞަމަދަކީވެސް އެތައްފަހަރެއްގެ މަތިން މިވަޒީފާއަށް ކުރިމަތި ލައިގެން ވަޒީފާ ނުލިބި ހުރެފާ ދާދި ފަހުން ކުޑަކަތީބު އަލްފާޟިލް ޢަބުދުއްނާޞިރު ޢަލީ ލަންދޫ އިންޖީނުގެ ހިންގުމާއި ޙަވާލުވެހުރި ދުވަސްވަރު އިންޖީނުގެއަށް މުވައްޒަފަކު ހޯދުމަށް ކުރެއްވި އިޢިލާނަކާއި ގުޅިގެންނެވެ.
މިހާ އުދަގުލުން ލިބުނު ވަޒީފާ ފައިސަލް އެދޫކޮށްލީ ކީއްވެތޯ ފައިސަލްގެ އަންހެނުންނާއި ލަންދޫއިންފޯގެފަރާތުން އަހާލުމުން ބުނުއްވީ ފައިސަލް އާއި ބެހޭގޮތުން ދޮގު ބުހުތާން ވަގުބަދުނާމް ވާހަކަތަކެއް ފެންމަތި ކޮށްގެން ބަޔަކުއުޅޭތީ އެކަމާއި ފައިސަލް ހިތްހަމަނުޖެހިގެންކަމަށެވެ. އަދި މިވާހަކަތައް ފަތުރައިގެން މިއުޅެނީ ކާކުތޯ އަހާލުމުން ބުނުއްވީ އެއީ އިންޖީނުގޭގައި އުޅޭ އެހެންމުވައްޒަފެއް ކަމަށް އެބޭފުޅާ އިތުރަށްކިޔައިދިނެވެ.
ފައިސަލް އިންޖީނުގެއިން ވަގަށް ތެޔޮގެންދާ ކަމާއި ، ތަފާތު އެހެނިހެން ޚިޔާނާތް ތައް އިންޖީނުގެއަށް ވަމުންދާވާހަކައަކީ ކޮންމެބަޔަކު ފަތުރައިގެން ދައްކާ ވާހަކައަކަށްވީކަމުގައިވިޔަސް މިހާރަކަށްއައިސް ރަށުތެރޭގައި ދައްކަމުން އަންނަވާހަކައެއްކަން ލަންދޫއިންފޯއަށް އެނގިފައިވެއެވެ. ލަންދޫއިންފޯއިން މި އިލްތިމާސް ކުރަނީ މިފަދަ ދޮގު އިލްޒާމް ތައް މީސްމީހުންގެ ބޮލުގައި އަޅުގަވައިގެން އެމީހުންގެ އަބުރާޢިއްޒަތް ނަގާލުމުގެ ބަދަލުގައި މައްސަލައެއް އުޅޭނަމަ ކޯޓަށް ހުށަހަޅައިގެން ނުވަތަ ކަމާބެހޭ ފަރާތްތަކަށް ހުށަހަޅައިގެން ބަލަ ތަޙްޤީޤު ކުރުމަށެވެ.

ސްކޫލްޚަބަރު

ރަމަޟާން ކުއިޒް މުބާރާތް މިރޭބާއްވަނީ......

ލިޔުނީ : އަޙްމަދު ދާއޫދު

ކޮންމެއަހަރެއްގެ ރަމަޟާން މަހާދިމާކޮށް ލަންދޫސްކޫލުން އިންތިޒާމްކޮށް ގެން އެސްކޫލްގެ ގްރޭޑް 8،9 އަދި 10 ށް އަމާޒުކޮށް ގެން ބާއްވާ އިސްލާމިކް ސްޓަޑީޒް ކްއިޒްމުބާރާތް މިރޭ އެސްކޫލްގައި ބާއްވާ ގޮެތަށް ހަމަޖެހިފައިވާ ކަމުގެ މަޢުލޫމާތު ލަންދޫއިންފޯއަށް ލިބިއްޖެއެވެ.

އެސް އެސް ސީ އިމްތިހާނަށް ކުދިންތައްޔާރު ކުރުވުމާއި އަދަބީ މުބާރާތް ތަކަށްކުދިންގެ ޝައުޤުއުފައްދާ އިސްލާމް މާއްދާއިން ރަގަޅު ނަތީޖާއެއް ޓެސްޓް ތަކުގައި ދަރިވަރުން ހޯދުމަށް ބާރުއެޅުމުގެ މަޤްޞަދުގައި ބާއްވާ މިމުބާރާތް ރޭވިފައިވާ ވަނީ 3 ބުރަކަށް ވާ ގޮތަށް ކަމަށް އެސްކޫލުން މަޢުލޫމާތު ދެއްވައެވެ. އަދި ކޮންމެ ބުރަކަށްވެސް ކޮލިފައި ވެވޭނީ ކަނޑައެޅިފައިވާ ވަކިމިންގަނޑަކަށް ޕޮއިންޓް ހޯދިގެން ކަމަށްވެއެވެ. އަދި ފައިނަލް ރައުންޑުގައި ވާދަކުރާ ދަރިވަރުންގެ ތެރެއިން އެންމެ ގިނަ ޕޮއިންޓް ހޯދާ 3 ދަރިވަރުން ހޮވާ ، ޚާއްޞަ އިނާމް ތަކެއް ދިނުމަށް ހަމަޖެހިފައިވާ ކަމަށްވެސް އެސްކޫލުން މަޢުލޫމާތު ދެއްވައެވެ.

މިމުބާރާތް އިންސާފުކުރުމަށް ޖަޖުންގެ ގޮތުގައި ތިއްބަވާނީ އެސްކޫލްގައި ތިއްބެވި ކަމަށް ޤާބިލް ޓީޗަރުން ކަމުގައިވެސް ލަންދޫއިންފޯއަށް މަޢުލޫމާތު ލިބިފައިވެއެވެ.

މިމުބާރާތް ހިނގާގޮތް ބެއްލެވުމަށާއި އަޑުއެހުމަށް ބޭނުންވާ ބޭފުޅުންނަށް ޖާގައޮތްވަރަކުން އެފުރުޞަތު ހުޅުވާލެވިފައިވާ ކަންވެސް އެސްކޫލުން ހާމަކުރައްވައެވެ. އަދި ވަކިން ޚާއްޞަކޮށް ގްރޭޑް 7 ން މަތީގެ ދަރިވަރުންނަށާއި ހުރިހާ ބެލެނިވެރިންނަށް ދައުވަތު އެރުވިފައިވާނެ ކަމަށް ވެސް މަޢުލޫމާތު ދެއްވައެވެ.

މިފަދަ ކަންމަކީ ސްކޫލްތަކުގައި އަބަދުވެސް ކުރަމުންއަންނަ އަދި ވަކިންޚާއްޞަކޮށް އެސް އެސް ސީ އިމްތިހާނާ ދިމާކޮށް ކުރަމުން އަންނަ ކަންތައްތަކެވެ. ސްކޫލްތަކުން ނޫނަސް އެހެނިހެން މުއައްސަސާ ތަކުން ނާއި ކްލަބު ޖަމިއްޔާ ޖަމާޢަތް ފަދަ ތަންތަނުން ވެސް މިފަދަ މުބާރާތް ތަކާއި ތަފާތު ޙަރަކާތްތައް ހިންގުމަކީ އެމުޖްތަމަޢު އެއްގައި ހެދިބޮޑުވަމުން އަންނަ ކިޔަވާ ޢުމުރުގެ ދަރިވަރުންނަށް ނުހަނު ފައިދާ އާއި މަންފާ ކުރާނެ ކަންތައްތައް ކަން ކަށަވަރެވެ.

ނަމަވެސް ހިތާމައަކީ މިފަދަ މާތްމައްސަރެއް ހުސްވެގެންދާއިރުވެސް ރަށުގައި އުފެދިފައިވާ ދެޖަމްޢިއްޔާއިން ކުރެ އެއްވެސް ޖަމްޢިއްޔާއަކުން މިފަދަ އަދަބީ ދީނީ އެއްވެސް ޙަރަކާތެއް ނުހިންގާ ކަމެވެ. ދީނީ ކަންކަމާއި އަދަބީކަންކަމަށް ދޭ ސަމާލުކަން ކުޑަކަމެވެ.

އަޅުގަނޑުމެން ލަންދޫއިންފޯގެ ޓީމް މިތިބީ މިފަދަ ކޮންމެ ކަމަކަށް މަރުޙަބާ ކިޔާ ރަށުގައި ހިންގާ ، ހިނގާ ތަފާތު ދާއިރާ ތަކުގެ ( އަދަބީ ، ދީނީ ، އަދި ކުޅިވަރާއި އިޖްތިމާއީ ) ޙަރަކާތްތަކުގެ ޚަބަރުތައް ލަންދޫއިންފޯމެދުވެރިކޮށް އެންމެހައި ބޭފުޅުން ނަށް ފޯރުކޮށްދިނުމުގެ އުފާ ލިބިގަތުގަތުމަށް ފެންބޮވައިގެންފައެވެ. އެއީ އޮފީހަކުން ހިންގި ޙަރަކާތެއް ވިޔަސް މަރުކަޒަކުން ހިންގިޙަރަކާތެއްކަމުގައި ވިޔަސް އަދި ލަންދޫ ޒުވާނުންގެ ޖަމްޢިއްޔާ އިންވިޔަސް ލަންދޫ ޔޫތު އެންކަރޭޖިން ސޮސައިޓީން ހިންގި ޙަރަކާތެއްކަމުގައިވިޔަސް މެއެވެ.

ކަމެއް ހިނގިއްޔާ ހިނގިކަމެއް ލަންދޫއިންފޯގެ އަހްލުވެރިންނަށް މިދަނީ ވީވަރަކުން ގެނެސްދެމުން ނެވެ. އެކަމަކު ނުހިނގާ ކަމެއްހިނގިކަމަކަށް ހަދައިގެން މިބްލޮގްގައި ޝާއިޢު ކުރުމަކީ ވޭތުވެދިޔަތާންގައި ކޮށްފައިވާނެކަމެއްނޫނެވެ. އަދި މީގެ ފަހުންވެސް ކުރާނެ ކަމެއްނުމެ ނޫންމެއެވެ.

ޚަބަރު

މާފަރުހުކުރުމިސްކިތުގޯތި ތެރެއަށް އަމިއްލަފަރާތްތަކަކުން ކަށިވެލިލައިފި

ލިޔުނީ : އަޙްމަދު ދާއޫދު

ނ.މާފަރު ކަތީބު އަލްފާޟިލް އަޙްމަދު ބަދީޢު އާއި ނ.މާފަރު ސްކޫލް ގެ ސްޕަވައިޒަރ އަލްފާޟިލް ޙަސަން އިބްރާހީމް އިސްނަންގަވައިގެން މާފަރުގެ ޒުވާނުންގެ ތެރެއިން 15 ވަރަކަށް މީހުންގެ އެހީއާއި އެކު އެރަށު ހުކުރުމިސްކިތުގޯތިތެރެއަށް ކަށިވެލިލައިފިއެވެ.
މިމަސައްކަތަކީ މާފަރުގައި ކޮންމެއަހަރެއްގެވެސް ރަމަޟާން މަހާއިގުޅިގެން ކޮންމެވެސް ބަޔަކުއިސްނަގައިގެން ވަރަށްކުރިއްސުރެވެސް ކުރެވެމުން އަންނަކަމެއްކަމަށް ލަންދޫއިންފޯއަށް މަޢުލޫމާތުލިބިފައިވެއެވެ. އެހެންއަހަރުތަކެކޭވެސް އެއްގޮތަށް މިފަހަރުވެސް ވެލިނަގާފައިވަނީ މާފަރާއި އެއްފަޅުތެރޭގައި އޮންނަ ރާސްފިނޮޅުންނެވެ.
މިމަސައްކަތުގައި ބައިވެރިވެލެއްވި ބައެއްބޭފުޅުން ހާމަކުރެއްވިގޮތުގައި މިމަސައްކަތަކީ ރޯދަމަހަށް ބަލާއިރު ވަރަށްބުރަމަސައްކަތެކެވެ. ދޯންޏެއްގައި ފިނޮޅަށްގޮސް ގޯނިތަކަކަށް ވެލިއަޅައިގެން ރޯދައަށް ތިބެ މިފަދަމަސައްކަތެއް ނިންމާލުމަކީ މިޒަމާނަށްބަލާއިރު އިޖްތިމާއީގޮތުން ކުރެވުނު ވަރަށްބޮޑުމަސައްކަތެއްކަމުގައި އެފަރާތުން އިތުރަށްހާމަކުރެއްވިއެވެ.
ގާތްގަޑަކަށް 700 ބަސްތާ ކަށިވެލި ތިންދުވަސްމަތިން ގެނެވިފައިވާނޭކަމަށާއި ތިންދުވަސް ވަންދެން ކޮންމެދުވަހަކުވެސް ދުވާލުވެލިގެނެސް ވެލިފެތުރުމުގެ މަސައްކަތް ކުރީ ރޭގަނޑުކަމުގައިވެސް ލަންދޫއިންފޯއަށް މަޢުލޫމާތުދެއްވިބޭފުޅާ ހާމަކުރެއްވިއެވެ.
ގިނަރަށްރަށުގައި މިސްކިތްތަކަށް ވެލިލުމުގެ މަސައްކަތް ކުރަނީ އެމިސްކިތަކަށް ސަރުކާރުން ކަނޑައަޅުއްވާ ލައްވާފައިތިބޭ މަސައްކަތު މީހުންނެވެ. ނަމަވެސް މާފަރުގައި ފެށުނީއްސުރެވެސް މިސްކިތަށް ވެލިލުމުގެ މަސައްކަތް ކުރެވެމުންއަންނަނީ މިފަދަގޮތަކަށް ކަމަށްވާއިރު މިއިންދޭހަވާ އެއް ޙަޤީޤަތަކީ ބަޔަކުއިސްވެ ކަމެއްރާވާ ކަމެއްކުރަން އުޅެފިނަމަ މާފަރުގައި އަދިވެސް އިޖްތިމާޢީ މިފަދަމަސައްކަތްތައް ރައްޔިތުން ގުޅިގެން ނުވަތަ ރައްޔިތުންގެ ތެރޭން ބަޔަކުނުކުމެ ފޯރިއާ ޖޯޝާއި އެކު ފަސޭހަކަމާއި އެކު ކުރެވިދާނެކަމެވެ.
މިފަދަމަސައްކަތް ތަކަކީ ރައްޔިތުންނަށް ފަސޭހައާއި މަދަދު ލިބިދެނިވި މަސައްކަތް ތަކެއްގެ އިތުރުން ޘަވާބާއި ދަރުމަ އެކުލެވިގެންވާނޭ މަސައްކަތްތަކެއްކަން ކަށަވަރެވެ.

ޚަބަރު

ސަރުކާރުންހަމަޖައްސަވާފައިވާބޮޑުމިނުގައި ފަޅުކޮނެނިންމާލުމަށްލަންދޫރައްޔިތުންއެއްބަސްވެއްޖެ!ސ

ލިޔުނީ : އަޙްމަދު ދާއޫދު

ލަންދޫގައި ސަރުކާރުން މިހާރުހައްދަވައިދެމުންގެންދަވާ 200 ފޫޓް 300 ފޫޓް ބޮޑުމިނުގެ ފަޅު މިހާރުވެސް ހައްދަވައިދެއްވުމަށް ސަރުކާރުން ނިންމަވާފައިވާ ބޮޑުމިނުގައި ކޮނމާއި މެދު ރައްޔިތުންގެ އެއްވެސް އިޢުތިރާޒެއްނެތް ކަމަށް މިދިޔަ އާދިއްތަދުވަހުގެރޭ 8:45 ގައި ލަންދޫ ރަށުއޮފީހު ގޯތިތެރޭގައި ބޭއްވި ލަންދޫރައްޔިތުންގެ ބައްދަލުވުމަކުން ވަރަށްތަނަވަސް އަޣުލަބިއްޔަތަކުންފާސްކޮށްފިއެވެ.
ރައްޔިތުންބައްދަލުކޮށް ވާހަކަދައްކަވަމުން ލަންދޫކަތީބު ނަޞީރު ވިދާޅުވީ ލަފާފުރުމުގެ ދަތިކަން ފިލުވައިދިނުމުގެ ގޮތުން ކޮނެއްދެއްވާ މިފަޅު ބޮޑުކޮށްދެއްވާތޯ ސަރުކާރުގެ ވަރަށްގިނަ ފަރާތްތަކުގައި ދެންނެވިފައިވާއިރު އެއިންއެއްވެސް ފަރާތަކުން ފަޅުބޮޑުކޮށްދެއްވާނެކަމުގެއެއްވެސް ސިގުނަލެއް ލިބިފައިނުވާކަމަށެވެ. އަދި މިގޮތަށް ފަޅުކޮނުނަނުދީ ހިފަހައްޓައިގެން ތިބެފިކަމަށްވަންޏާ ، މިހާރު އެކޮނެދެއްވާވަރުގެ ތަންކޮޅެއްވެސް ލަންދޫރައްޔިތުންނަށް ނުލިބި ދިޔުމަކީ ވަރަށް އެކަށީގެންވާ ކަމެއްކަމުގައެވެ.
ކަންއޮތްގޮތް ވަރަށްބޮޑަށް ތަފްޞީލް ކޮށްދެއްވުމަށްފަހު ރިޔާސަތުން ވޯޓަށްއެއްސެވުމުން ގާތްގަޑަކަށް %98 ރައްޔިތުންގެ ވޯޓުން އެގޮތަށް ފާސްވީއެވެ.
ފަޅުގެމައްސަލައިގެ އިތުރުން ދެންމިބައްދަލުވުމުގައި ހުށަހެޅިގެންދިޔައީ ލަންދޫރައްޔިތުންގެ އިންޖީނުގެ ހިންގުމުގައި އިސްކޮށް ރައްޔިތުންގެ ތެރެއިން މީހަކުބަހައްޓައިގެން އިންޖީނުގެ ހިންގަންފެނޭތޯ ރައްޔިތުންގެ ޚިޔލުހޯދުމެވެ. މުސާރަ މަހަކު -/2000 ރ. ދީގެން އިންޖީނުގޭގެ ހުރިހާ ޒިންމާއެއް އުފުލައިގެން އިސްވެރިއެއްގެ ގޮތުން މަސައްކަތް ކޮށްދެއްވާނެ މީހަކު ރައްޔިތުްންގެ ތެރޭގައި ހުރިތޯ ބެލުމަށް ރިޔާސަތުން ނަޞީރު ރައްޔިތުންނާއި ސުވާލުކުރުމުން މިކަމަށް އިސްނެންގެވި ހަމައެކަނީ ބޭފުޅަކީ ލަންދޫ ނާޒް އަލްފާޟިލް ޒަހީނު ޙަސަންއެވެ.
މިކަމާމެދުރައްޔިތުންގެ ވޯޓަކަށް އެއްސެވުމުން ޙާޟިރުވެ ތިއްބެވި 88 ރައްޔިތުންއިއްތިފާޤުވީ މިހާރުވެސް ލަންދޫރައްޔިތުންގެ އިންޖީނުގެ ހިންގަމުން ގެންދާގޮތަށް ލަންދޫއޮފީހުގެ ބެލުމުގެ ދަށުން ހިންގަމުން ގެންދިއުމަށެވ.ެ
މިބައްދަލުވުމުގައި އިންޖީނުގެއިން މަހެއްގެމައްޗަށް އެވްރެޖްކޮށް ހިނގާޚަރަދާއި ލިބޭއާމްދަނީގެ ތަފްޞީލްވެސް ރިޔަސަތުން ރައްޔިތުންނަށް އޮޅުންފިލުވައިދެއްވިއެވެ.
މިރިޕޯޓްއިއްވައިދެއްވަމުން ނަޞީރުވިދާޅުވީ މިހާރު އިންޖީނުގެއިން މަހަކު އެވްރެޖް ކޮށް -/83000 ރ. ވަނީ ގެއްލުންކަމަށެވެ. އަދި މިވާ ގެެއްލުން ފޫބައްދަނީ ސަބްސިޑިޒް ގެ ގޮތުންގައި ލަންދޫރައްޔިތުންނަށް ދެއްވާފައިވާ 5 ލައްކަ ރުފިޔާއިންކަމަށެވ.ެ އަދި އިތުރަށްވިދާޅުވީ މި 5 ލައްކަރުފިޔާއިން މިއަހަރުގެ ކުރިއަށް ބައިގެ އިންޖީނުގެ ގެއްލުން އެއްވެސް ދަތިކަމެއްނެތި ފޫބެއްދޭނެކަމަށެވެ. ލަންދޫރައްޔިތުފިރިހެނުންގެ 88 މީހުން ޙާޟިރުވި މިބައްދަލުވުމުގެރިޔާސަތުގައި ތިއްބެވީ ލަންދޫކަތީބު އަލްފާޟިލް ޙަސަންނަޞީރު އާއި ، ލަންދޫ ގެ ދެމުދިމުންކަމުގައިވާ ޙުސެއިން އާދަމް އަދި ޚާލިދު ޢަބުދުލްހަކީމް އާއި ލަންދޫ އޮފީހުގެ ސެކެރެޓަރީ އަލްފާޟިލް ސަލީމް ޙުސެއިންއެވެ.

ލަންދޫފަޅުގެ ޝީޓްޕައިލް ކުރުމުގެ މަސައްކަތް ލަންދޫއޮފީހުން ހުއްޓުވާލައިފި

ލިޔުނީ : އަޙްމަދު ދާއޫދު

ލަފާފުރުމުގެ ދަތިކަން ފިލުވައިދިނުމުގެ މަޝްރޫޢުގެ ދަށުން ނ.ލަންދޫގައި ކޮނެދެއްވާ ފަޅުގެ މަސައްކަތުގެ ވަރަށްބޮޑުބައެއް ނިމިފައިވަނިކޮށް މިއަދު 10:00 އެހާކަށްހާއިރު މިމަސައްކަތުގައި އުޅުއްވާ އެމްޓީސީސީގެ ބޭފުޅުންނާ ބައްދަލުކޮށް މިހާރުކުރަމުންގެންދާ ޝީޓްޕައިލްކުރުމުގެ މަސައްކަތް އިތުރަށް ކުރިއަށް ނުގެންދިޔުމަށް ލަންދޫއޮފީހުގެ ފަރާތުން އެބޭފުޅުންނަށް އަންގައިފިކަމަށް ލަންދޫއޮފީހުން ލަންދޫއިންފޯއަށް މަޢުލޫމާތުދެއްވައިފިއެވެ.
ލަންދޫއޮފީހުން މަޢުލޫމާތު ދެއްވިބޭފުޅާ ވިދާޅުވީ މިމަސައްކަތް އިތުރަށް ކުރިއަށް ގެންދިޔަނުދީ ހުއްޓުވާލަންޖެހުނީ ފަޅާގުޅިގެން ދެކުނުފަރާތުން އޮޑިއެހެލާ ސަރަޙައްދެއް ހައްދަވައިދިނުމަށް އެދި ސަރުކާރުގެ ކަމާބެހޭ މިނިސްޓްރީ ތަކުގަޔާއި އަދި ޚާއްޞަކޮށް އެމްޓީސީސީ ގައި އެތައްފަހަރެއްގެމަތިން އެދިފައިވާއިރު އެއްވެސް ޖަވާބެއް އަދި މިހާތަނަށް އެއްވެސްފަރާތަކުން ދެއްވާފާނުވާތީއެވެ. "ކޮންމެކަމަކަށްވެސް ޔޭސް އޯރ ނޯ އޮންނާނެ ދޯ" ލަންދޫއޮފީހުން ވާކަދެއްކެވިބޭފުޅާ ވިދާޅުވިއެވެ.
ލަންދޫރައްޔިތުންނާއި ލަންދޫގެ އޮޑިވެރިންގެފަރާތުން އަބަދުވެސް އެދެމުން މިދަނީ މިފަޅަކީ ލަންދުއަށް އެކަށީގެންވާ ވަރަށްވުރެ ކުޑަފަޅަކަށްވާތީ ފަޅާގުޅިގެން އޮޑިއެހެލާ ސަރަޙައްދެއް ހަދައިދިނުމަށްކަމަށް ލަންދޫއޮފީހުން ހާމަކުރެއްވިއެވެ. ލަންދޫއޮފީހުން އިތުރަށް ވިދާޅުވީ އޮޑިއެހެލާ ތަނެއް ހަދައިނުދެއްވާ ކަމުގައިވާނަމަ ފަޅުގެ ދިގުމިނަށް 100 ފޫޓް އިތުރުކޮށްދެއްވުމަކީ ވެސް ކޮންމެވެސް ވަރެއްގެ ހައްލެކެވެ. ނުވަތަ ފަޅުގެ ދެކޮޅުގައި ހުރަހަށް ޖަހަމުން އެގެންދާ ޝީޓްޕައިލްތައް އެގެންދާ ގޮތަށް ބޭރުތޮއްޓާ ހިސާބަށް ގެންގޮސްދިނުމަކީ ވެސް ރަގަޅުގޮތެކެވެ.
މިހާރު ސަރުކާރުން ހަމަޖައްސާފާ ވާގޮތަކީ ހުރަސްތޮށީގެ 50 ފޫޓްގައި ޝީޓްޕައިލް ކޮށްފާ ބާކީ އޮތްބައިގާ ބޮޑުހިލަޖައްސާގޮތަށެވެ. މިގޮތަށް ހަދައިފިނަމަ ފަޅުގެ ދެކޮޅުންކުރެ އެއްކޮޅެއްގައިވެސް ، ތޮށިގަނޑުގައި ޖައްސާ ދޯނިފަހަރު އަޅާފާނުބޭއްވޭނެކަމަށް އޮފީހުން ވިދާޅުވެއެވެ. ސަބަބަކީ އެތަންކޮޅުކުޑަކަމާއި ލަންދޫގައި ހުރި ދޯނިފަހަރު ގިނަވުމެވެ.
ލަންދޫއޮފީހުން ވާހަކަދެއްކެވި ބޭފުޅާ އިތުރަށް ވިދާޅުވީ އެބޭފުޅުން މިމަސައްކަތް މިހުއްޓުވާލީ ރައްޔިތުންގެ އެއްވެސް ޕްރެޝަރެއް ރަށުއޮފީހަށް އައިސްގެންނެއްނޫނެވެ. އެހެންނަމަވެސް ރައްޔިތުންއެދޭ ގޮތަށް މިމަސައްކަތް ސަރުކާރުންކުރިއަށް ނުގެންދަވާނަމަ ރައްޔިތުންގެތެރެއިން ބަޔަކު ނުވަތަ މުޅިރައްޔިތުން އިދިކޮޅަށް ނުކުތުމަކީވެސް ވަރަށްގާތްކަމެވެ. ކޮންމެއަކަސް މިމަސައްކަތް އިތުރަށް ކުރިއަށް ގެންދިއުމުގެހުއްދަ ރަށުއޮފީހުންދެން ދެއްވާނީ ، ސަރުކާރުގެ ކަމާބެހޭ މިނިސްޓްރީތަކަށް މިކަމާގުޅޭގޮތުން ލަންދޫއޮފިހުން ފޮނުއްވާ ފައިވާ ސިޓީތަކުގެ ޖަވާބު ލިބުނީމަކަމަށްވެސް ލަންދޫއޮފީހުން ހާމަކުރައްވައެވެ.
މަސައްކަތާ ހަވާލުވެގެންއުޅޭ ކޮންޓްރެކްޓަރުންނަށް ރަށުއޮފީހުން މަސައްކަތް ކުރިއަށްނުގެންގޮސް މަޑުކުރުމަށް އެންގެވުމުން އެބޭފުޅުން މިހާރު އިންތިޒާރުކުރައްވަމުން ގެންދަވަނީ އެމްޓީސީސީގެ ބަހެއް މިކަމާގުޅޭގޮތުން ލިބޭތޯކަމަށް މިމަސައްކަތްކުރުމަށް އިސްކޮށް ހުންނެވި އެކުންފުނީގެ ބޭފުޅާ ލަންދޫއިންފޯއަށް މަޢުލޫމާތުދެއްވާފާވެއެވެ.
މީގެކުރިންވެސް ލަންދޫފަޅުގެ މަސައްކަތް ގާތްގަޑަކަށް 6 މަސްދުވަހަށް މެދުކަނޑާލަށް ޖެހިފައިވެއެވެ. އެފަހަރު ދިމާވި މައްސަލައަކީ ތިމާވެއްޓާ ގުޅޭގޮތުން ހަދަންޖެހޭ ރިޕޯޓް ނުހަދާ އެމްޓީސީސީއިން މިމަސައްކަތް ފަށާފާ ވާކަން ސަރުކާރަށް އެގިވޑައިގެން އެރިޕޯޓް ހެއްދެވެންދެން މަސައްކަތް ހުޢްޓާލައިފާ އޮތީއެވެ.
އެހެންބައެއްރަށްށުގައި ހަދާހެން ރައްޔިތުންގެ ތެރޭން ބަޔަކު ނުވަތަ މުޅިރައްޔިތުން ނުކުމެ ފަޅުކޮނުގެ މަސައްކަތަށް ހުރަސްއަޅާ މަސައްކަތް ހުއްޓުވާހެން ، ލަންދޫރައްޔިތުން ނުކުމެ ހުރަސްއަޅާ މަސައްކަތް ހުއްޓުވާލުމުގެ ކުރިން ލަންދޫއޮފީހުން އިސްނަންގަވައިގެން މިދެއްކެވީ ވަރަށްރަގަޅުމިސާލެއްކަމަށް ލަންދޫއިންފޯއިން ދެކެމެވެ. ސަބަބަކީ ގިނަރަށްރަށުގައި މިކަހަލަ ކަންތައްތައް ނިމިގެންގޮސްފައިވަނީ ރަށުއޮފީހާ މާބޮޑުގުޅުމެއްނެތި ވަރަށްހުތުރު ޤަބޫލުކުރަންއުދަނގޫ ގޮތްގޮތަށެވެ. އިރާދަކުރެއްވިއްޔާ ލަންދޫ ރައްޔިތުން އެދޭގޮތަށް އަދި ލަންދޫ އޮފީހުން މަސައްކަތް ކުރަމުން އެގެންދަވާގޮތަށް އާޚީރުގައި، ލަންދޫފަޅަށް އިތުރު 100 ފޫޓް އިތުރުވެ ނުވަތަ ދެކޮޅުގައި އެޖައްސާ ޝީޓްޕައިލް ކަނޑުތޮއްޓާ ހިސާބަށް ގެންގޮސްދެއްވުމުގެ ނުވަތަ ފަޅާގުޅިގެން ފަޅުގެދެކުނުކޮޅުގައި އޮޑިއެހެލާތަނެއް ހައްދަވައިދެއްވުމުގެ ވިސްނުންފުޅު ސަރުކާރުގެ ކަމާބެހޭބޭފުޅުންނަށް މާތްﷲ ދެއްވާނެއެވެ.

ލަންދޫޒުވާނުން ދިއްލައިގެން ފުޓްބޯޅަކުޅެންފަށައިފި

ލިޔުނީ : އަޙްމަދު ދާއޫދު

ލަންދޫޒުވާނުންނަކީ ފެށުނީއްސުރެވެސް ކުޅިވަރަށް ޚާއްޞަކޮށް ފުޓްބޯޅައަށް ވަރަށްބޮޑަށް ލޯބިކުރަމުން އަންނަބައެކެވެ. އެގޮތުން އެކިއެކި މުބާރާތްތައް ރަށުފެންވަރުގައި ބާއްވާ އަދި ކައިރިރަށްރަށުގެ ޒުވާނުންނާއި އެކު އެކުވެރިކަމުގެ ފުޓްބޯޅަމެޗްތައް ކުޅެމުންއަންނަނީ ފުދޭވަރަކަށް ގިނައިންނެވެ. މިފަދަ މުބާރާތްތަކާއި މެޗްތަކުގެ ފައިދާ ލަންދޫޒުވާނުންނަށް އެކަށީގެންވާ ގޮތެއްގައި ލިބެމުންދާކަމުގެ އަލިގަދަހެއްކަކީ އަތޮޅުގެ ފުޓްބޯޅައިގެ ގަދަބާރަކަށް މިހާރު ލަންދޫޒުވާނުންގެ ފުޓްބޯޅަޓީމް ވެގެންގޮސްފާވާކަމެވ.ެ
ކޮންމެ އަހަރެއްގެ ރޯދަމަހަކީވެސް ލަންދޫޒުވާނުން ނަށް ކުޅިވަރުގެ އާފޯރިއެއް ގެނެސްދޭމަހެކެވެ. އެގޮތުން ހަވީރު ވޮލީކުޅުމާއި ރޭގަނޑު ފުޓްބޯޅަ ކުޅުމަކީ އެމީހުންގެ އާދަކާދައަކަށް މިހާރުމިވަނީ ހަދާފައެވެ. އަޅުގަނޑުމެން ހަދާންހުންނަށް ފެށީއްސުރެވެސް ކޮންމެ އަހަރެއްގެރޯދަމަހު ކޮންމެވެސް ސިފައެއްގައި ކުޅިވަރުތައް ލަންދޫގައި ކުޅެމުން އާދެއެވެ.
މިފެށުނު ރަމަޟާން މަހުމިވަނީ މުޅިން އާމަރުޙަލާއަކަށް ލަންދޫޒުވާނުންގެ ފުޓްބޯޅައިގެ ފޯރިގެންގޮސްދީފައެވެ. ރަށުގެ ޒުވާނުންގެ ތެރެއިން ޢަބުދުލް ޣަނީ ޢުމަރު އިސްވެ ހުންނަވައިގެން މިހާރުމިވަނީ ޒުވާނުންގެ ފުޓްބޯޅަދަނޑުގައި މާރކަރީ ލައިޓް ޖަހައިގެން ރޭގަނޑު ފުޓްބޯޅަކުޅެވޭ ފެންވަރަށް ދަނޑު ދިއްލާފައެވެ.
ދަނޑުގައި ޖަހާފައިވާ ލައިޓްތަކަކީ އެންމެފަހުން ބޭއްވުނު ރައްޔިތުންގެ މަޖްލީހުގެ އިންތިޚާބަށް ކެމްޕޭންކުރައްވަން ނ.އަތޮޅުމެމްބަރ އަލްފާޟިލް ޢަބުދުﷲ ޔާމީން ލަންދުއަށް ކުރެއްވި ދަތުރުފުޅުގައި ޒުވާނުންނަށް އެބޭފުޅާ ހަދިޔާކުރެއްވި ލައިޓްތަކެއްކަމަށް މަޢުލޫމާތުލިބިފައިވެއެވެ. 1000 ވޯޓްގެ 2 މާކަރީ ލައިޓްދިއްލުމުގެ ކަރަންޓް ދެއްވާފައިވަނީ ލަންދޫރައްޔިތުންގެ އިންޖީނުގެއިން ހިލޭސާބަހަށް ކަމަށްވެސް މަޢުލޫމާތު ލިބިފައިވެއެވެ.
ކުރިންވެސް ދެންނެވުނުފަދައިން މީގެ ކުރީގެ އަހަރުތަކުގައިވެސް އެކިއެކި އަމިއްލަ ފަރުދުންގެ އެހީތެރިކަމާއި އެއްބާރުލުން ލިބިގެން ލައިޓްޖަހައިގެން ފުޓްބޯޅަ އަދި ވޮލީވެސް ލަންދޫގައި ކުޅެފައިވެއެވެ. ނަމަވެސް މިފަހަރު ދަނޑުގައި ޖަހާފައިވާ ލައިޓްތަކުން ކުރީގެ އަހަރުތަކާ ޚިލާފަށް އަލިގަދަވެ ކުޅުމަށް ފަސޭވެފައިވާ ކަން އެނގިގެންދަނީ ރަށުގެ ހުރިހާޒުވާނުންކަހަލަ ގޮތަކަށް ދަނޑަށްގޮސް ފުޓްބޯޅަ ކުޅުމުގައި ބައިވެރިވެ ވަރަށް ފޯރިއާއި އެކު ކުޅެމުންދާކަމެވެ. މިއީ މިހާރަކަށް އައިސް ރަށްރަށުގައި އޮންނަ އެއްބައިވަންތަކަމާއި އެކުވެރި ކަމަށްވިސްނާލާއިރު ވަރަށްމަދުންނޫނީ ނުފެންނަމަންޒަރެއްކަން އުފަލާއެކު ފާހަގަކުރަންޖެހެއެެވެ. ސިޔާސީ އޮއިވަރެއްގެ ސަބަބުން ނުވަތަ އެހެންވެސް ބައިބައިވުމެއްގެ ސަބަބުން ގިނަރަށްރަށުގައި އެއްބަޔަކު އިސްނަގައިގެން ކުރާކަންތައްތައް އަނެއްބަޔަކު ފުލޮޕްކޮށްލަން އުޅޭމަންޒަރު ނޫނީ ނުފެނެއެވެ. ލަންދޫގައި ކުރިންވެސް އޮތް އެކުވެރިކަން އަދިވެސް ޒުވާނުންގެ މެދުގައި އޮތް ކަން މިފަދަ ކަންކަމުން ވަރަށްރަގަޅަށް ސާބިތުވެއެވެ.